İranın da kriptovalyutası olacaq

İran Mərkəzi Bankı rəqəmsal pul buraxacaq. 

Sfera.az “investing.com” saytına istinadən xəbər verir ki, “kripto rial” adlandırılacaq pula İran böyük ümid bəsləyir. 

İran Mərkəzi Bankının rəsmiləri hesab edirlər ki, rəqəmsal valyuta layihəsi milli valyuta riala nəzarəti artıracaq və maliyyə bazarlarına yeni imkanlar açacaq.

Məlumata görə, İranın rəqəmsal valyutası ABŞ-ın texnologiya nəhəngi IBM tərəfindən yaradılan “Hyperledger Fabric” vasitəsilə hazırlanan “Borna” adlı platformada işləyəcək. İran rəsmiləri kripto rialın yüksək təhlükəsizliyə malik olacağını deyirlər. 

İran Mərkəz Bankının sədri Əli Salenhabadi mövzu ilə bağlı verdiyi açıqlamada kripto rialın infrastruktur və qaydalarının hazır olduğunu, rəqəmsal vəsaitin əskinas və sikkələrlə birlikdə yeni milli valyuta olaraq görüləcəyini bildirib.

Şərhlərə görə, İranın kripto valyuta tədavül etməkdə məqsədi ABŞ-ın sanksiyalarından yayınmaqdır. Keçən ay idxal əməliyyatlarında kriptovalyutaların istifadəsinə icazə verən İranda avqustun əvvəlində kripto aktivlərdən istifadə edilərək 10 milyon dollar idxal edilib.

Vasif,
Sfera.az