“Şagirdlərdə görmə və fizioloji problemləri yaranır” – Həkim
Rusiyanın tibb elmləri namizədi, Hemotest laboratoriyasının həkim-eksperti Yekaterina Demyanovskaya şagirdlərin üzləşdiyi sağlamlıq problemlərindən danışıb.
Sfera.az “Lenta.ru”ya istinadən xəbər verir ki, həkim məktəbdə uşaqlarda görmə və duruşda problemlərin (onurğanın fizioloji əyrilərinin pozulması) yaranmağa başladığını bildirib.
O, müsahibəsində məktəbliləri narahat edən digər xəstəliklərin də adını çəkib, həmçinin mütəmadi olaraq tibbi müayinədən keçməyin zəruriliyindən danışıb:
“Yay tətilindən sonra uşaqlar dərslər və əlavə məşğələlərə başlayırlar. Bu, onlarda gərginlik yaradır. Bunun nəticəsində uşaqların bədənində fiziki və psixoloji gərginlik artır, soyuqdəymə mövsümü ərəfəsində uşaq qruplarında viruslar sürətlə yayılır”.
Həkim xatırladıb ki, təhsil fəaliyyətinin özünəməxsus xüsusiyyətləri var, buna görə də, məktəblilərin mütəmadi olaraq oftalmoloq, ortoped, nevroloq və ya psixoloqa müraciət etməsi vacibdir.
Yekaterina Demyanovskaya qeyd edib ki, yeni tədris ilinin açılmasından öncə şagirdlər hökmən həkim müayinəsindən keçməli və onların hər birinin sağlamlığı öyrənilməlidir. Həkimin fikrincə, bu, xüsusilə, bədən tərbiyəsi dərsləri üçün vacibdir:
“Müəllim dərsdəki fəaliyyəti tələbələrin sağlamlıq qrupuna uyğun və əks göstərişləri nəzərə alaraq planlaşdırır. Əgər uşağın səhhətində problemlər varsa, hər bir valideynin vəzifəsi yük məhdudiyyətlərini həkimlə müzakirə etmək və bu məlumatı məktəbə ötürməkdir”.
Vasif,
Sfera.az