Reabilitasiya mərkəzində işgəncə görən uşağın anası: "Əvvəl kamera ilə izləyə bilirdik, sonradan dedilər ki..."

Uşaqlara işgəncə verən “Mehnur” Reabilitasiya Yaşam Mərkəzi bu gün fəaliyyətini dayandırıb.

Sfera.az “Yeni Sabah”a istinadən xəbər verir ki, bu gün körpələr mərkəzə qəbul olunmayıb. Buna səbəb mərkəz əməkdaşlarının hüquq-mühafizə orqanları tərəfindən aparılan araşdırmaya cəlb olunmasıdır. Ehtimal olunur ki, işgəncə faktları yayılandan sonra mərkəzin fəaliyyəti ümumiyyətlə dayandırılacaq.

Hazırda uşaqları mərkəzdə müalicə üçün yerləşdirilən valideynlər “Mehnur” Reabilitasiya Yaşam Mərkəzinin qarşısına toplanıb. 

Yayılan videoda döyülən 4 yaşlı Cavid Cəbrayılovun  anası Qasımova Səbinə “Yeni Sabah”a açıqlamasında bildirib ki, övladının eşitmə əngəli var: “İki aydır uşağı müalicə üçün bu mərkəzə qoymuşduq. Əvvəl kamera ilə izləyə bilirdik, amma sonradan dedilər ki, kameralar xarab olub. Uşağın döyüldüyü yer dəhlizdir. Uşağın üzündə xəsarətlər də var”. 

Maraqlıdır ki, mərkəzin əməkdaşları jurnalistlərin əraziyə toplanmasına qarşı aqressiv münasibət göstərib, onları uzaqlaşdırmağa cəhd göstəriblər.