Ermənistan mediasında antiRusiya meyillərinin günü-gündən artdığı müşahidə olunur. Bu fonda sosial medianın erməni seqmentində xüsusilə rus sülhməramlılarının əmrlərinə tabe olmamaqla bağlı çağırışlar artır.

Maraqlıdır, ermənilər tərəfindən rusiyalı sülhməramlılara qarşı hər hansı təxribat ola bilərmi?

Bununla bağlı politoloq Teymur Qasımlı Sfera.az-a açıqlamasında deyib ki, ermənilər tarixən öz dövlət maraqları üçün  Rusiyaya qarşı belə kampaniyalar aparıblar:

“Nəticə etibarilə yenə barışıb və Azərbaycan əleyhinə birgə hərəkət ediblər. Məsələn, çarın dövründə kilsələri bağlanmış ermənilər etirazlar etdilər, daha sonra Çar İkinci Aleksandrın zamanında kilsələr yenidən açıldı. Yəni bu hadisələr mütəmadi olaraq olub. İndi də öz dövlət maraqları çərçivəsində rus sülhməramlılarını günahlardırırlar. Bu, təbii haldır. Müharibə, o cümlədən sonuncu “Qisas” əməliyyatından sonra ermənilərin ciddi itkiləri oldu. Amma düşünmürəm ki, onlar Rusiya sülhməramlılarına qarşı hər hansı təxribat etsinlər”.

Müsahibimiz bildirib ki, ermənilərin əks addım atması da mümkündür: “Yəni sülhməramlılara qarşı təxribatlar törədib, bunu bizim üstümüzə də ata bilərlər. Bu, erməni xislətidir. Ümumilikdə orada olan qeyri-qanuni erməni silahlı birləşmələrinin hamısı Rusiyanın əmr və tapşırıqlarını yerinə yetirir. Təxribat olacaqsa, yalnız onlar edə bilər”.

Günay Rəsulqızı