İraqlı aktrisa kilolu fotosundan istifadə edən jurnalı məhkəməyə verdi
İraqlı aktrisa və aparıcı Enas Taleb kilolu fotosunu paylaşan jurnalı məhkəməyə verib.
Sfera.az bildirir ki, İngiltərədə nəşr olunan həftəlik xəbərlər, beynəlxalq əlaqələr və iqtisadiyyat jurnalı “Economist” 42 yaşlı aktrisanın 9 ay əvvəl İraqda keçirilən Babil Beynəlxalq Festivalında çəkilmiş fotosundan istifadə edib.
Jurnal " Ərəb dünyasında niyə qadınlar kişilərdən daha çəkilidir" başlığı ilə yazını oxuculara təqdim edib. Kilolu olduğu fotonun kontekstdən kənar, onun icazəsi olmadan istifadə edildiyini bildirən Taleb, sözügedən şəklin istifadəsinin onun azadlığını və şəxsi həyatını pozduğunu bildirib. Taleb həmçinin şəklin fotoşop olduğunu iddia edib. O, məqalənin ümumiyyətlə ərəb və xüsusən də İraq qadınlarını təhqir etdiyini deyib və “Economist”in niyə Avropa və ya ABŞ-da deyil, ərəb dünyasındakı kök qadınlarla maraqlandığını sorğulayıb. Jurnalın dərc etdiyi məqalə sosial mediada tənqid hədəfinə çevrilib. Sosial media istifadəçiləri sözügedən məqaləni “irqçi” və “seksist” kimi qiymətləndirərək, ərəb qadınlarını “utandırdığını” bildiriblər.
Qeyd edək ki, Enas Taleb İraqın ən tanınmış aktrisalarından biridir və İnstaqramda 9 milyon izləyicisi var.
Türkan