“Dünən Ermənistan Silahlı Qüvvələri Azərbaycan Ordusunun mövqelərini ümumilikdə 10 dəfə atəşə tutub. Məlumata görə, 6 fakt Azərbaycan-Ermənistan dövlət sərhədində, 4-ü isə Rusiya sülhməramlılarının müvəqqəti yerləşdiyi ərazilərdə baş verib”.

Sfera.az xəbər verir ki, bu sözləri siyasi şərhçi Kənan Novruzov son günlər Ermənistan-Azərbaycan dövlət sərhədində, habelə Rusiya sülhməramlılarının müvəqqəti yerləşdiyi Azərbaycan ərazilərində artan erməni təxribatlarını şərh edərkən deyib.

Onun sözlərinə görə, "Qisas" əməliyyatının nəticə verəcəyinə ümid etsək də, belə olmadı:

“Ermənilər Laçını boşaltmağa başlasa da, provokasiyalar ara vermir. Əlbəttə, təxribatları Qarabağdakı terrorçu ermənilər törədir. Amma sülhməramlılar da bu məsələdə maraqlı ola bilərlər.

Birincisi, ona görə ki, Kreml Qarabağdakı mövcudluğunu qorumaq, mümkünsə sülhməramlıların sayını artırmaq istəyir.

İkincisi, indi Ermənistanda Qərblə Moskva arasında mübarizə gedir. Belə olan halda sülhməramlı "kartı" Rusiya üçün əsas "kozır"dır.

Lakin sabotajların arxasında kimin və hansı məqsədlərin dayanmasının bizim üçün heç bir fərqi yoxdur. Biz həm qarşı tərəfə, həm də vasitəçi Rusiyaya xəbərdarlıq etmişik. Bildirmişik ki, bu yolla İrəvanın vaxt udmasına imkan verə bilmərik. Azərbaycan Prezidenti İlham Əliyev bu günlərdə fransalı həmkarı Emmanuel Makron və Avropa İttifaqı Şurasının Prezidenti Şarl Mişellə telefon danışığında söylədi ki, gərginliyə görə Ermənistan hərbi - siyasi hakimiyyəti məsuliyyət daşıyır. Ermənistan bu xəbərdarlıqlardan dərs çıxarmaq fikrində olsaydı, təxribatlarını davam etdirməzdi. Deməli, özləri də sübut edirlər ki, Azərbaycana əks- hücum əməliyyatlarından başqa yol qoymurlar.

Əgər təxribatlar davam edərsə, yəqin ki, "Qisas"ın davamı da gələcək. Bunu hər kəs, Rusiya da, Ermənistan da, beynəlxalq təşkilatlar da bilməlidir”.

Turan Rzayev