“İrana, yaxud digər kənar təsirlərə görə Azərbaycanın inanclı kəsimini, xüsusilə çoxluğun mənsub olduğu şiəliyi bütövlükdə hədəf seçmək təhlükəli tendensiyadır. Bu, onların özgələşdirilməsi, başqa ölkələrə doğru itələnməsi ilə nəticələnir”.

Bu sözləri Sfera.az-a açıqlamasında siyasi şərhçi Asif Nərimanlı Məhərrəmlik ayı ilə əlaqədər Bakının Məşədi Dadaş məscidində təşkil edilən dini ayində Azərbaycan bayraqlarının dalğalandırılması haqda danışarkən deyib.

Onun sözlərinə görə, İran ölkəmizə qarşı din siyasətini məhz “şiələr təqib olunur” iddiası üzərindən qurur:

“Bu mənada Məşədi Dadaş məscidindəki görüntülər illərdir görmək istədiyimiz mənzərədir. İnanclı insanlarımızın əlində dini bayraqlar yox, üzərində İslamın rənginin də olduğu Azərbaycan bayrağı var.

Məşədi Dadaş məscidi vaxtilə İranın Bakıda əsas təsir mərkəzlərindən idi. İndiki mənzərə bu təsiri aradan qaldırmağın, dəyişiklik etməyin mümkünlüyünü, ən azı buna ümidin olduğunu göstərir”.

Turan Rzayev