Rusiya televiziyasında Ukraynanın işğalına etiraz edən Marina Ovsyannikova uzun müddətdən sonra səssizliyini pozub.

Sfera.az bildirir ki, ölkəsinə qayıtmağa qərar verən jurnalist diqqətçəkən açıqlamalar verib.

“AFP”-ə danışan və başına gələcəklərdən xəbərdar olduğunu etiraf edən 44 yaşlı iki uşaq anası hər an həbs oluna biləcəyini deyib. Etiraz qərarını “Rus ruleti oynamağa qərar verdim” sözləri ilə yekunlaşdıran Ovsyannikova fikirlərini bu cür ifadə edib: “Həbs qərarı versələr, bir gün ərzində bunu edəcəklər. Cəmi bir neçə saniyə çəkəcək”.

Xatırladaq ki, Rusiyada müxalifətçilər, eləcə də Putin tərəfdarları tərəfindən tənqid edildiyini bildirən jurnalist “Rusiyanın ən nifrət etdiyi adam” elan edilib. Etirazı ilə bir anda dünyanın bir nömrəli gündəminə çevrilən rusiyalı jurnalist hadisədən dərhal sonra nəzarətə götürülüb.

Məhkəmə tərəfindən 14 saat sorğu-sual edilən və 30 min rubl cərimələnən Ovsyannikova etirazdan bir qədər əvvəl lentə aldığı videoda Ukraynanın işğalını "cinayət" adlandırıb və ittiham etdiyi kanalda işləməkdən utandığını bildirib.

“Rusların zombilərə çevrilməsinə icazə verməkdən utanıram. Biz bu qeyri-insani rejimi sükutla seyr edirdik”, deyə o söyləyib. Atasının da ukraynalı olduğunu deyən Ovsyannikova Rusiya xalqını müharibəyə etiraz etməyə çağırıb və “Heç nədən qorxmayın, hamımızı həbs edə bilməzlər” deyib.

Günay Rəsulqızı