Ərdoğanla Putinin növbəti “Soçi sınağı” – Nələr müzakirə olunacaq?
Türkiyə Prezidenti Rəcəb Tayyib Ərdoğan sabah Rusiyaya gedir. O, Soçidə rusiyalı həmkarı Vladimir Putinlə görüşəcək.
Məlum görüşlə bağlı fikirlərini Sfera.az-la bölüşən siyasi analitik Turab Rzayev bildirib ki, Rusiya ilə Türkiyə arasında həm strateji ortaq məqsədlər, həm də qarşıdurmalar həddindən artıq çoxdur. Bu baxımdan da iki ölkə arasında müzakirə ediləcək məsələlərin siyahısı genişdir.
Analitik qeyd edib ki, görüşdə ilk öncə Ukrayna-Rusiya müharibəsi müzakirə obyekti olacaq:
“Artıq Ukrayna məsələsi dalana dirənib və Ərdoğanın bütün səyləri məhz Putin Rusiyasını bu dalandan çıxarmağa hesablanıb. Müzakirə ediləcək ikinci məsələ ərzaq qıtlığı ilə bağlı ola bilər. Türkiyənin özündə də müəyyən qədər ərzaq qıtlığı və bahalaşma hökm sürür. Yəqin ki, xüsusilə Ukrayna taxılının çıxarılması ilə bağlı çox ciddi çalışmalar olacaq. Ərdoğan hazırda Ukrayna ilə Rusiya arasında həm yeganə siyasi vasitəçi rolunu oynayır, həm də Ukrayna taxılının çıxarılması ilə bağlı səy göstərir. Bu da dünyada ərzaq qıtlığının qarşısını ala bilər.
Görüş zamanı Suriya ilə bağlı məsələnin də masada olacağı istisna deyil. Türkiyə Suriya ilə yeni hərbi əməliyyatlar aparmaq istəyir. Burada həm İran, həm Rusiya, həm ABŞ, həm də Suriya və İsrail Türkiyənin qarşısında yer alır. Türkiyə bu məsələ ilə bağlı ən azı Rusiyanı öz tərəfinə çəkməyə və Rusiyanın susqunluğunu əldə etməyə çalışacaq”.
T.Rzayevin fikrincə, son günlər Qarabağ cəbhəsində baş verən gərginliklər də Soçi görüşündə müzakirə ediləcək: “Azərbaycanın haqlı mövqeyi açıq şəkildə yenə Rusiya tərəfinə çatırılacaq. Eyni zamanda Türkiyə ermənilərin tərkisilah olması ilə bağlı öz mövqeyini ortaya qoyacaq. Türkiyə Rusiya sülhməramlılarının bölgədə olmasından narahatdır.
Digər mövzular isə Türkiyənin Yunanıstan və ABŞ-la problemləri, Liviya və Mərkəzi Asiya ölkələri ilə münasibətlərdir. Gündəm həddindən artıq genişdir, lakin əsas mövzular Ukrayna məsələsi, Suriya və Qarabağ böhranıdır”.
Yeganə