ABŞ-ın ev təsərrüfatlarının (ailələr və ya fərdi şəxslər – red.) borcu ikinci rübdə 16 trilyon dolları keçib.

Sfera.az “Bloomberg”ə istinadən xəbər verir ki, ABŞ-da ev təsərrüfatlarının borcu bu ilin ikinci rübündə əvvəlki rüblə müqayisədə 2 faiz artaraq 16,15 trilyon dollara çatıb.

İlin ikinci rübündə əvvəlki rüblə müqayisədə ev təsərrüfatlarının borcu 312 milyard dollar, son bir ildə isə 1,2 trilyon dollar artıb.

Bu dövrdə ABŞ-da ev təsərrüfatlarının borclarının artmasında mənzil (ipoteka) kreditlərindən qaynaqlanan borcların artması təsirli olub. İpoteka kreditləri amerikalıların ev təsərrüfatlarının borcunun ən böyük hissəsini təşkil edir. Bu borc maddəsi üzrə öhdəlik 2-ci rübdə 207 milyard dollar artaraq 11,39 trilyon dollara yüksəlib.

Amerikalıların ən çox borc götürdüyü digər maddələr 1,59 trilyon dollarla tələbə kreditləri, 1,5 trilyon dollarla avtomobil kreditləri və 890 milyard dollarla kredit kartlarıdır.

ABŞ ikinci rübdə kredit kartı üzrə borclar 46 milyard dollar, avtomobil kreditləri üzrə borc 33 milyard dollar, tələbə kreditləri üzrə borclar isə 1 milyard dollar artıb.

Vasif

Sfera.az