"Rusiya əvvəlki kimi deyil: Şərqi Zəngəzur və Abşeronda Türkiyə hərbi bazası olmalıdır" - Politoloq
“İkinci Qarabağ müharibəsindən sonra regionda yeni reallıqlar ortaya çıxıb. Azərbaycan yeni geosiyasi nizam yaradıb. Bundan əlavə, Rusiya-Ukrayna müharibəsi fonunda yaxın regionda təhlükəsizlik riskləri ən üst səviyyədədir. Ümumiyyətlə, beynəlxalq siyasi nizam dəyişilir və dövlətlərin sərhədlərinin dəyişməsi də uzaq perspektivdə deyil”.
Sfera.az xəbər verir ki bunu, politoloq Məhəmməd Əsədullazadə deyib.
O bildirib ki, Cənubi Qafqaz risk zonasıdır və Ermənistanla Azərbaycan arasında sülh müqaviləsi bağlanmayıb:
“Ermənistan manevrlər edir. Xüsusilə, Rusiya və İranın diktəsi ilə əldə olunan razılaşmaları yerinə yetirmir. Bu da regionda təhlükəsizliyin pozula biləcəyini göstərir.
Bundan əlavə, Azərbaycan öz təhlükəsizliyi və yeni risklərə qarşı hərbi doktrinasında dəyişiklik etməlidir. Qəbul edilən Konstitusiyada bir çox maddələr və hərbi doktrina indiki şərtlərə cavab vermir. Prezident İlham Əliyev də artıq dünyanın siyasi nizamının dəyişdiyini vurğulayıb. Ona görə də, mütləq şəkildə Azərbaycan ərazisində qardaş Türkiyənin hərbi bazasının olması üçün hüquqi əsas olmalıdır”.
Politoloqun fikrincə, artıq Rusiya əvvəlki Rusiya deyil:
“Türkiyə də güclü şəkildə inkişaf edib. İranın ölkəmizə qarşı hibrid və digər parametrlərdə təzyiq etmək siyasətini görürük. Ona görə də, Türkiyənin hərbi bazası Şərqi Zəngəzurda və Abşeron yarımadasında təsis edilməlidir. Yeni hərbi-siyasi çağırışlar bunu diktə edir.
Konutitusiyada dəyişikliklər üçün keçirilməsi nəzərdə tutulan referendumla bir çox bəndlər mövcud və gələcək risklər, siyasi çağırışlarla uzlaşmalıdır”.
Turan Rzayev,
Sfera.az