ABŞ dollarının dəyərində artıq 3-cü həftədir ki, enmə müşahidə edilir.

Sfera.az xatırladır ki, bu ilin iyulun 14-də dolların məzənnə dəyəri ən yüksək həddə çatdıqdan sonra tədricən enir.

Dolların ümumiləşmiş məzənnə dəyərini Dollar İndeksi ifadə edir. İyulun 14-də indeks 108,8 səviyyəsinə çatdıqdan sonra davamlı enərək bu gün 105,6 həddinə çatıb.

Qısa müddətdə yaranan fərq 3 faizə yaxındır.

Dolların ucuzlaşması dünyada yüksək inflyasiya səbəbindən mərkəzi bankların sərt monetar siyasətə keçməsi və buradan qaynaqlanaraq qlobal iqtisadiyyatın böhran təhlükəsi ilə üzləşməsi ilə əlaqədardır. Böyük maliyyə qurumları hesab edir ki, bu vəziyyətdə ilin sonunda bəzi iri iqtisadiyyata sahib olan ölkələrdə kiçilmə ehtimalı var.

Artıq ən böyük iqtisadiyyata sahib ABŞ-da ikinci rübdə ümumi daxili məhsul (ÜDM) istehsalı illik müqayisədə 0,9 faiz azalıb. Birinci rübdə azalma 1,6 faiz olmuşdu.

ABŞ hökumətinin proqnozuna əsasən növbəti rüblərdə azalma dayanacaq və illik müqayisədə kiçik də olsa artım baş verəcək.

Amma müstəqil ekspertlər baş verənlərin böhran əlaməti olduğunu düşünür. Əgər ABŞ iqtisadiyyatında böhran yaşanarsa, o halda, dolların bahalaşma ehtimalı aradan qalxacaq. Buna görə də investorlar zərurət olmadıqca dollarla olan aktivlərə sərmayə etməkdən çəkinir ki, bu da ABŞ valyutasını ucuzlaşdırır.

Vasif
Sfera.az