Ceki Çan yeni filmi üçün niyə Suriyanı seçdi? – SƏBƏB

Məşhur çinli aktyor və rejissor Ceki Çan yeni filmi üçün Suriyanı seçib.

Sfera.az bildirir ki, məkan olaraq paytaxt Dəməşq yaxınlığındakı Həcər əl-Əsvəd qəsəbəsi seçilib. Çin kinosunun əfsanəvi adı Ceki Çan filmdə rol almasa da, prodüserlik edəcəyi qeyd edilib. Məlumata görə, aktyorun Suriyaya getməsi gözlənilmir. Çin komandası bölgədə çəkilişlərə başlasa da, Suriyadakı səhnələri bir neçə günə tamamlamaq hədəflənir.

Çinin Suriyadakı səfiri çoxsaylı tankların yerləşdirildiyi çəkiliş meydançasına baş çəkib və mərasim zamanı tanklardan birinin qarşısında “Sülh və Sevgi” yazısı olan pankart asılıb.

Qeyd edək ki, film 2015-ci ildə vətəndaş müharibəsinin davam etdiyi Yəməndən yüzlərlə çinli və 10 fərqli ölkə vətəndaşlarının xilas edildiyi əməliyyatdan bəhs edir. O zaman bölgədəki Çin hərbi gəmiləri dəniz quldurluğu ilə mübarizə aparmaq üçün Yəməndən təxliyyəni təmin edirdi və bu, Çinin beynəlxalq nüfuzu üçün mühüm hadisə kimi dəyərləndirilirdi. Film bu əməliyyatdan ilhamlansa da, ssenariyə görə hadisələr Yəmən və ya Suriyada deyil, “Poman” adlı xəyali ölkədə cərəyan edir.

Xatırladaq ki, bir vaxtlar əhalinin sıx məskunlaşdığı Dəməşqin ətrafı olan Həcər əl-Əsvəd 2018-ci ildə Suriya hökuməti tərəfindən İŞİD-dən geri alınıb. Bundan sonra bir neçə sakin köhnə evlərinə qayıdıb.

Türkan

Sfera.az