ANS-in tanınmış aparıcısı yeni kanala keçməsinin səbəbini açıqladı - DETALLAR

ANS televiziyasının tanınmış aparıcısı Rahil Sayadoğlu və prodüseri Nazim Xəliloğlunun yeni iş yeri bəlli olub. Onlar yeni televiziya mövsümündən etibarən "Region TV”-də fəaliyyətlərini davam etdirəcək.

Bu barədə Admiral.az-a açıqlamasında aparıcı Rahil Sayadoğlu məlumat verib. O bildirib ki, özü və prodüser Nazim Xəliloğlu bu mövsüm 2 telelayihəyə start verəcək:

"Mən və ANS-dən olan həmkarım Nazim Xəliloğlu "Region TV-də iki layihədə çalışacağıq. Onlardan biri yeni layihədir. Bu haqda bir müddət sonra ictimaiyyətə məlumat verəcəyik. Hələlik, detalları tam olaraq açıqlamırıq, amma qısaca onu deyim ki, bu yeni layihə sosial şəbəkələri əhatə edəcək. Digər layihə isə "Günün ardınca" adlanır. "Region TV”-nin məşhur verilişlərindən biridir. Bu ildən layihədə dəyişikliklər olacaq. Bu dəyişikliklərdə bizim də əməyimiz olacaq. "Günün ardınca” verilişində redaktor vəzifəsində çalışacağam”.

Rahil Sayadoğlu bildirib ki, ANS bağlanmamışdan öncə təklif alıblar:

"Amma təklifi dəyərləndirməyə tələsmirdik. Çünki əlimizdə işlər vardı və işləri yarımçıq qoya bilməzdik. Amma belə alındı ki, kanalın ümumi fəaliyyəti dayandırıldı. Biz də təkliflə razılaşdıq və bu keçid reallaşdı. Əslində, ANS-dən öyrəndiklərim çoxdur. Bu kanal sözün hər mənasında məktəbdir. Amma dəyişikliklər olmadan nə yaşamaq, nə də işləmək mümkündür. Yeni kanal, yeni layihə, yeni komanda - bu dəyişiklik bizə lazım idi. Yəni bizim gedişimizin kanalın bağlanması ilə birbaşa əlaqəsi yoxdur. Bunu "batan gəmini tərk etmək" mənasında anlamaq doğru deyil. Biz ANS-in bağlanmasının hələ gündəmdə olmadığı vaxtlarda kanalı tərk etmək haqda düşünürdük. Gələcəkdə yenidən bu kanala yolumuz düşə bilər və canla-başla işləyə bilərik. Amma indiki halda getmək ən doğrusu idi bizim üçün”.

Qeyd edək ki, Rahil Sayadoğlu ANS TV-də yayımlanan "Şəbəkə” verlişinin aparıcısı, Nazim Xəliloğlu isə "Ağıl dəryası", "Beşbarmaq" layihələrinin prodüseri olub.