Şimali Koreya ilə Ukrayna arasında diplomatik gərginlik
Şimali Koreya ilə Ukrayna arasındakı gərginlik davam edir.
Sfera.az bildirir ki, Şimali Koreyanın dövlət xəbər agentliyinə danışan Xarici İşlər Nazirliyinin sözçüsü Ukraynanın dövlətlərarası münasibətlərdə neytrallığa və ədalətə zidd hərəkətlər etdiyini iddia edib.
“Kiyevin, Pxenyanın suverenliyin qanuni şəkildə həyata keçirilməsi ilə bağlı qərarını şübhə altına almağa haqqı yoxdur. Onların bu mövqeyi ABŞ-ın Şimali Koreyaya qarşı “irrasional, qeyri-qanuni və düşmənçilik” siyasətinə uyğundur”, deyə o bildirib.
Xatırladaq ki, Şimali Koreya Rusiya tərəfindən işğal olunmuş Ukraynanın Donetsk və Luqansk vilayətlərinin müstəqilliyini birtərəfli qaydada tanımaq qərarına gəlib. Ukrayna Xarici İşlər Nazirliyi bu qərarı “Ukraynanın suverenliyi və ərazi bütövlüyünü pozmağa cəhd, Ukrayna Konstitusiyasının, Birləşmiş Millətlər Təşkilatının Konvensiyasının və beynəlxalq hüququn əsas norma və prinsiplərinin kobud şəkildə pozulması” kimi qiymətləndirərək, Pxenyanla diplomatik əlaqələri kəsib.
Günay Rəsulqızı