İyunun 7-də Rusiya Prezidenti Vladimir Putin parlamentdə təmsil olunan partiyaların rəhbərləri ilə keçirilən görüşdə Ukraynada apardıqları müharibə ilə bağlı iddialı fikir səsləndirib. Putin müharibədə Rusiyanın hələ ciddi heç nəyə başlamadığını bildirmişdi. Prezident görüş zamanı qeyd edib ki, Qərb və Ukrayna liderləri Rusiyanı döyüş meydanında məğlub etməyin mümkünlüyü barədə bəyanatlar verirlər, lakin Moskva hələ ki, tam potensialını nümayiş etdirməyib.

Kremlin sözçüsü Dmitri Peskov Putinin “Rusiya Ukraynada hələ ciddi heç nəyə başlamayıb” sözlərini şərh edib.

Sfera.az TASS-a istinadən xəbər verir ki, Peskov bu sözləri Rusiya və Ukraynanın potensialının müqayisəedilməz olduğu anlamına gəldiyini deyib:

“Putin bununla sadəcə xatırlatdı ki, potensiallar tamamilə müqayisə olunmazdır. Rusiyanın bu baxımdan potensialı o qədər böyükdür ki, onun yalnız kiçik bir hissəsi hazırda xüsusi hərbi əməliyyat zamanı istifadə olunur”.

Bundan əvvəl Putin Ukraynada keçirilən xüsusi əməliyyatın yekun nəticəsinin istənilən halda əldə ediləcəyini bildirib.

Vasif
Sfera.az