“Meşə yanğınları qlobal təhlükədir və ekologiyada fəsadlar yaradır, insanların həyat və sağlamlığına, əmlaklara zərər verir”.

Bunu Sfera.az-a açıqlamasında təhlükəsizlik məsələləri üzrə ekspert Elmar Nurəliyev deyib. Müsahibimiz  bildirib ki, meşə yanğınlarının baş verməməsi üçün mütləq qabaqlayıcı tədbirlər görülməlidir:

“Yanğından kimsə sığortalanmayıb, bu, təbii səbəblərdən də baş verə bilər. Ola bilər ki, meşəlik ərazidə ildırım çaxması və ya günəş şüalarının istiliyindən yaranan genişmiqyaslı yanğınlar olsun. İnsan faktoru olan yerdə bu cür hadisələrin baş verməsi qaçılmazdır. Qabaqlayıcı tədbirlərlə belə hadisələrin daha geniş miqyasda yayılmasının qarşısını almaq mümkündür. Meşə sahələri ümumiyyətlə təmiz olmalıdır. Xüsusən də isti yaz-yay aylarında quru otlar, alaqlar, ərazidə çürümüş ağaclar , yarpaqlar  mütləq təmizlənməlidir. Eyni zamanda meşəlik ərazilərə istirahətə gələn şəxslərin yanğın təhlükəsizliyi qaydalarına riayət etmələrinə dair tədbirlər keçirilməli, məlumatlar verilməli, xəbərdaredici nişanların vurulması təmin edilməlidir.

Bundan başqa, meşə təsərrüfatı hansı qurumun balansındadırsa (hansısa sahibkar, turizm obyekti və.s), onlar mütləq şəkildə qorumaya da məsuliyyət daşımalı və burada bütün təhlükəsizlik tədbirlərini həyata keçirməlidirlər”.

Müsahibimiz deyib ki, meşəlik əraziyə yaxın yaşayan vətəndaşlara məxsus evlərin, obyektlərin yanğın təhlükəsizlik sistemləri olmalıdır:

“Bu, ehtiyat su çəni, süni və təbii göllər ola bilər. Mümkündür ki, göllər hansısa sahibkara verilsin və o da gölü qurudub yerində başqa obyekt tiksin, bu, yanlışdır. Çünki yanğın hadisələrində bu cür göllərdən istifadə olunur. Təəssüf ki, bəzən təbii göllər də qurudulur. Bunlar hamısı kompleks görülən tədbirlər planıdır, meşələrin yanğından qorunmasına dair ümumi təhlükəsizlik konsepsiyasında ayrıca işlənməlidir. Nəzərə almaq lazımdır ki, meşə sahələri mürəkkəb coğrafi relyefə malik olan yerlərdir və burada baş verən yanğın qısa zamanda daha geniş əraziyə yayılır. Onun söndürülməsi belə ancaq xüsusi texnikalarla edilir, fiziki olaraq insan əməyindən istifadə etmək çətin olur. Bu baxımdan meşələrin qorunması üçün xüsusi tədbirlər planı həyata keçirilməlidir. Meşə sahələri həmçinin məişət tullantıları ilə zibillənməli deyil. Həmin ərazilərdə məişət tullantılarının qalaqlanması, yandırılması, zibilliyin vaxtında təmizlənməməsi yolverilməzdir və bu kimi hallar yanğınlara səbəb olur”.

Günay Rəsulqızı

Qeyd: Material Azərbaycan Respublikası Medianın İnkişafı Agentliyinin maliyyə dəstəyi ilə hazırlanıb.

Mövzu: ekologiya və ətraf mühitin mühafizəsi