Finlandiya və İsveçin  NATO-ya üzvlük məsələsi xeyli vaxtdır gündəmdədir. Alyansın baş katibi buna müsbət münasibətini ifadə edib və bildirib ki, bu, Avropanın təhlükəsizliyinə töhfə olar.

Maraqlıdır, sözügedən məsələ necə yekunlaşacaq?

Bununla bağlı Sfera.az-a açıqlama verən siyasi şərhçi Kənan Novruzov deyib ki, Avropanın təhlükəsizliyinə təhdidin getdikcə artdığı bir vaxtda NATO- ya üzv olmaq həmin dövlətlər üçün taleyüklü məsələdir. Müsahibimiz xatırladıb ki,  terrorçuları dəstəklədiyinə görə isə Türkiyə buna etiraz edir:

“Beləliklə, Ankaranın istəyi Moskvaya da sərf edir.  Çünki Finlandiya və İsveçin NATO-ya üzvlüyü Rusiyanın strateji maraqlarına uyğun deyil.  Mövcud fikir ayrılıqlarına görə NATO və Türkiyə arasında münasibətlərin tədricən pisləşdiyi hiss olunur. Bu "incikliyin" gələcəkdə bir az da çoxalacağı istisna deyil. Təşkilatın üzvlərindən biri, o cümlədən Türkiyə İsveç və Finlandiyanın Alyansa üzvlüyünə rəsmi veto qoyacağı təqdirdə, həmin dövlətlərin üzvlüyü mümkün olmayacaq. Ankara hazırkı narazı mövqeyini rəsmiləşdirsə, artıq onun NATO-dan çıxarılması məsələsi gündəmə gələ bilər”.

K.Novruzov qeyd edib ki, Türkiyənin NATO-dan çıxarılması təşkilat üçün arzuolunan deyil:

“Çünki Ankara həm də Moskva ilə münasibətlərin nizamlanması üçün NATO-ya lazımdır. Bütün bunları nəzərə alsaq deməliyik ki, Finlandiya və İsveçin hələlik NATO-ya üzvlüyü real görünmür. Amma  gələcəkdə bu istiqamətdə müəyyən addımların atılması da gözləniləndir. Beləliklə, həm Alyans, həm də namizəd ölkələr öz inadkarlıqlarını nümayiş etdirməyə çalışa bilərlər”.

Günay Rəsulqızı
Sfera.az