Şimali Koreya pandemiya ilə ənənəvi üsullarla mübarizə aparır.

Sfera.az bildirir ki, bu barədə Şimali Koreya Mərkəzi Xəbər Agentliyi tövsiyələr dərc edib. 

Belə ki, media orqanı COVİD-19-a yoluxub xəstəliyi ağır keçirməyənlərə zəncəfil çayı kimi bitki çayları içməyi məsləhət görüb. Eyni zamanda bəzi tədqiqatçıların duzlu suyun həm boğazda, həm də burunda soyuqdəyməyə səbəb olan viruslarla mübarizə aparması istiqamətindəki bilgiləri pandemiyaya da şamil edilib. Lakin virusun bu üsulla qarşısının alına biləcəyini göstərən heç bir elmi məlumat yoxdur. Elə bu səbəbdən də Şimali Koreyanın pandemiya ilə mübarizədə bu üsullara etibar etməsi sosial şəbəkələrdə geniş müzakirələrə səbəb olub. 

Qeyd edək ki, Şimali Koreyada koronavirusa yoluxma sayı 2 milyona yaxınlaşıb. Son 24 saatda 262 min 270 nəfərdə yüksək hərarət əlamətləri müşahidə olunub, aprel ayının sonundan bu yana ölkədə yüksək hərarətli insanların sayı 1 milyon 980 min nəfərə yüksəlib.

Şimali Koreya keçən il Çinin qlobal peyvənd planı olan “Covax” çərçivəsində təklif etdiyi 3 milyon doza vaksini rədd etmişdi. Lakin sözügedən ölkə, bu yaxınlarda Çinin Şenyan şəhərinə üç boş təyyarə göndərdi. Təyyarələrin tibbi ləvazimatları götürərək ölkəyə qayıtması planlaşdırılır.

Günay Rəsulqızı
Sfera.az