\"Direktorların təyinatında ciddi qanun pozuntularına yol verilir\" - Deputat iki məktəbin adını çəkdi

 

Sfera.az bildirir ki, bunu deputat Etibar Əliyev deyib. Millət vəkili qeyd edib ki, ümumtəhsil məktəblərinin özündə çalışan direktor müavinləri təyinatdan kənarda qalır:

"Boşalan direktor yerlərinə kənar məktəblərdən direktor müavinləri təyinat alırlar. Bu isə kollektivdə intriqaların yaranmasına, idarəçilik ənənələrinin pozulmasına və bütün dünyada qəbul olunmuş sosial lift prinsipinin ayaqlar altına atılmasına səbəb olur.  Konkret olaraq iki nümunə göstərəcəm. 210 nömrəli tam orta məktəbə 95 nömrəli  tam orta məktəbdə direktor müavini işləyən Həqiqət Gülalıyeva birbaşa direktor təyin olunub. 165 nömrəli tam orta məktəbə isə 252 nömrəli məktəbdə cəmi bir ilə yaxın direktor müavini işləmiş Ruslan Nağıyev birbaşa təyin olunub”.

E.Əliyev bildirib ki, ümumtəhsil məktəblərinə direktor vəzifəsinə təyinat təcrübəsi, şəxsi bacarıq və keyfiyyətləri əsas götürülməklə təlimlərə cəlb olunduqdan sonra müvafiq imtahan və müsabiqələrdən keçən şəxslər təyinat almalıdırlar:

"Verilən məlumatlara görə, hər iki şəxs faktiki olaraq imtahan və müsahibələrdə iştirak etməyiblər. Belə halların sayı çoxdur. Həmçinin qapalı və mübhəm direktor təyinatları geniş vüsət alıb”.