"1995-ci il ulu öndərin rəhbərliyi altında hazırlanan konstitusiyada söz, fikir və mətbuat azadlığı ilə bağlı konkret müddəalar əksini tapmışdı. Onun rəhbərliyi ilə söz və plüarilizmə mane olan müddəalar aradan qaldırıldı".

Sfera.az xəbər verir ki, bunu Medianın İnkişafı Agentliyinin İcraçı direktoru Əhməd İsmayılov Ulu Öndər Heydər Əliyevin 99 illiyi münasibətilə təşkil olunmuş "Heydər Əliyev və müstəqil Azərbaycan mediasının inkişafı" adlı tədbirdə çıxışı zamanı bildirib.

Ə.İsmayılov ümummilli liderin Azərbaycan mətbuatının demokratikləşdirilməsi yolunda atdığı addımlara diqqət çəkib:

"Ulu öndər medianın beynəlxalq, demokratik standartlara uyğunlaşdırılması üçün mühüm işlər görüb. Jurnalistlərin sosial müdafiəsinin gücləndirilməsi, onlara güzəştlərin edilməsi istiqamətində əhəmiyyətli işlər görülüb. Ulu öndər Azərbaycan mətbuatını yaradılmasının yubileylərinin təşkil edilməsinin əsasını qoyub". 

MEDİA sədri ümummili liderin media siyasətinin onun ardıcılı tərəfindən layiqincə həyata keçirildiyini də vurğulayıb:

"Hazırda öz inkişafının mühüm mərhələsini yaşayan Azərbaycanda məqsədyönlü və ardıcıl siyasət həyata keçirilir. Prezident İlham Əliyev də mətbuatın inkişafı istiqamətində mühüm işlərin görülməsi ilə bağlı müvafiq göstərişlər verib.

Müzəffər ali baş komandanın 44 günlük savaşda qalibiyyətə imza atması bütün sahələrdə olduğu kimi media tərəfindən də yüksək dəyərləndirilir. Dövlət başçısı demək olar ki, bütün müşavirələrdə güclü ictimai nəzarətin olmasına, problemlərin həllinə də diqqət çəkir".


Əzizə Zeynal