Bununla bağlı Sfera.az-a açıqlama verən politoloq Əlimusa İbrahimov deyib ki, Fransa Prezidenti Emmanuel Makronun Rusiya-Ukrayna münaqişəsi ilə əlaqədar göstərdiyi təşəbbüslər yeni deyil desək, mübaliğə etmərik. Müsahibimizin sözlərinə görə, o, bu missiyanı ilk prezidentliyi dövründə də fəal şəkildə həyata keçirirdi:

"Əlbəttə, Fransa prezidentinin ilk məqsədi Türkiyəni danışıqlar prosesindən uzaqlaşdırmaq və təşəbbüsü ələ almaqdır. Daha sonra isə Makron, ABŞ və Böyük Britaniyanın  bu müharibədəki rollarını azaltmağa çalışır. Çünki müharibə davam etdikcə Ağ Ev ortaya daha böyük sərmayə qoyur. Böyük Britaniya da Ukraynanın silah-sursat və hərbi ləvazimatla təmin edilməsində ciddi rol oynamağa başlayır. Avropa İttifaqı Ukraynanın zəruri silah, hərbi texnika, ərzaqla təmin edilməsində ABŞ-la müqayisəolunmaz səviyyədə geri qalır. Müharibə uzandıqca NATO-nun Avropa üzrə müttəfiqlərinin bir tərəfdən hərbi ehtiyatı tükənir, digər tərəfdən Rusiya hücumu qarşısında onların da müasir Amerika silahlarına tələbatı artır”.

Politoloq qeyd edib ki, Rusiya-Ukrayna müharibəsi Şərqi Avropa dövlətlərinin ABŞ ətrafında daha sıx birləşməsinə gətirib çıxarır və  bu,  nə Fransa, nə də Almaniyanın ürəyincədir:

"Axı Avropanın bu hegemon dövlətlərinin qarşılarına qoyduqları məqsədlərdən biri də ABŞ-dan hərbi sahədə asılılığın getdikcə azaldılmasıdır. Müharibə nə qədər tez bitərsə, Fransa və Almaniya üçün bir o qədər faydalı olacaq. Çünki Avropanın mərkəzində olan münaqişə bu ölkələrin həm də iqtisadi cəhətdən zəifləməsinə gətirib çıxarır. Bu gün Türkiyənin vasitəçiliyinə qısqanclıqla yanaşan Fransa və Almaniya sabah bu vasitəçilik üçün Türkiyəyə yalvaracaqlar. Çünki, Türkiyənin malik olduğu mexanizm bu Avropa dövlətlərində mövcud deyil”.