Bununla bağlı Sfera.az-a açıqlama verən siyasi şərhçi Kənan Novruzov deyib ki, savaşın ilk günlərinə nisbətən Qərbin Kiyevə dəstəyi indi daha aydın görünür və bu, onu deməyə əsas verir ki, bütün prosesləri idarə edə Qərb imiş:

"Məhz bəzi NATO ölkələri əvvəlcə Ukraynanı "bataqlığa” çevirdilər, sonra isə Rusiyanı bura çəkdilər. Məqsəd Kremli zəiflətmək, onu idarə olunan vəziyyətə gətirməkdir. Lakin Qərb hələ istədiyi nəticəni əldə etməyib. Ona görə də Türkiyə xarici işlər naziri Mövlud Çavuşoğlunun da dediyi kimi, Alyans daxilindəki bəzi dövlətlər savaşın bitməsində maraqlı deyillər. Kiyevə dəstəyin, o cümlədən hərbi təminatın davam etməsi də bu baxımdan qiymətləndirilməlidir. NATO baş katibinın sözügedən açıqlaması əslində heç də Ukraynaya dəstəyin təzahürü deyil. Bu, daha çox Alyansın arzuları, gələcək planları kimi qiymətləndirilməlidir”.

Müsahibimiz qeyd edib ki, yaxın günlərdə NATO-nun Ukraynaya daha ağır silahlar verəcəyini güman etmək olar:

"Əvvəllər də dediyimiz kimi, döyüşlərin Rusiya ərazisinə keçməsi ehtimalı qətiyyən istisna deyil. Hətta, ola bilsin, Dnestryanıdakı hadisələr də Kreml üçün əks effekt versin və Rusiyanın daha da zəifləməyinə şərait yaratsın. Hər halda bu, Qərbin arzuladığı ssenaridir. Məsələ aydındır: savaş asanlıqla bitməyəcək. Artıq Qərb dövlətlərinin müharibəyə təsir imkanları artır. Bunun fonunda döyüşlər tərəflərin  nəzarətindən çıxır. Qərb Rusiya ilə bağlı məqsədlərinə çatmayanadək savaşı dayandırmayacaq. Həmin nəticə isə region üçün daha ciddi təhlükələr yaradacaq”.