Qriqoryanın son bəyanatı nəyə hesablanıb? – AÇIQLAMA
Media
13:25 / 06.05.2022
1661
Ermənistan Təhlükəsizlik Şurasının katibi Armen Qriqoryan Bakıdan Qarabağdakı ermənilərin təhlükəsizliyinə təminat istədiyini açıqlayıb.
Qarabağ münaqişəsinin hələ də qaldığını iddia edən Qriqoryan əlavə edib ki, məsələnin həllini ermənilərin təhlükəsizliyinin və hüquqlarının təmin edilməsində görürlər və Azərbaycanla bunu müzakirə edəcəklər.
Maraqlıdır, Qriqoryanın bu açıqlaması nəyə hesablanıb? Təhlükəsizliyin təmin olunması dedikdə qarşı tərəf hansı təklifi nəzərdə tutur?
Mövzu ilə bağlı Sfera.az-a danışan politoloq Tofiq Abbasov Ermənistan tərəfinin belə bir açıqlama verməsinin arxasında bir məsələnin dayandığını bildirib:
"Ermənistanın Təhlükəsizlik Şurasının rəhbərinin dedikləri aktual olmayan və gündəlikdən kənar istəklərdir. Çünki Azərbaycan torpağında yaşayan hər bir insanın, o cümlədən ermənilərin hüquqlarının təminatçısı Azərbaycan dövləti və Prezident İlham Əliyevdir. Bu, həm də dövlət başçısının konstitusiyadan irəli gələn borcudur. Ermənistanda hakimiyyətə kim gəlir gəlsin, onlar heç nə edə bilməyəcəklər. Ermənistan XİN rəhbəri yaxud baş nazir Nikol Paşinyan bu məsələləri qabartmaqla dünyada yaşayan ermənilərinə göstərmək istəyirlər ki, guya onlar Azərbaycanla prinsipial tərzdə münasibətlər qururlar”.
Politoloq Ermənistanın indiki məqamda yalnız bir bəyanat verməsinin doğru olduğunu diqqətə çatdırıb:
"Lakin Azərbaycan üçün bu məsələnin önəmi yoxdur. Ermənistanın Qarabağda qalıqları Azərbaycana pənah gətirmək istəyirsə, heç bir problem olmayacaq. Əgər onlar silahdan, dağıdıcılıqdan uzaq olsalar, hüquqları təmin olunacaq. Qarabağ bölgəsi artıq bərpa olunur və ermənilərin orada olması bizim üçün problem yaratmır. Ermənistan rəhbərliyinin bu istiqamətdə açıqlama verməsi çox mənasızdır, çünki bizim gündəliyimiz tamamilə başqadır. Bu açıqlama Ermənistanın daxili auditoriyasına hesablanıb. Ermənistanın indiki məqamda ancaq sülh sazişini imzalamağa hazır olduğu ilə bağlı bəyanat verməsi lazımdır”.
Əzizə Zeynal
Sfera.az
