Pekin hesab edir ki, Qərb ölkələri Rusiya ilə əməkdaşlığına görə Çinə qarşı sanksiyalar tətbiq edəcəklər. Pekin bu məqsədlə Çin iqtisadiyyatının sanksiyalara müqavimət gücünü öyrənməyə başlayıb. Nəşr Çinin müvafiq dövlət strukturlarının ölkənin bank sistemindən tutmuş müxtəlif şirkətlərə qədər təftişlər həyata keçirdiklərini yazır. 

Sfera.az-ın məlumatına görə, bununla bağlı politoloq Elxan Şahinoğlu deyib ki,  Pekin Rusiya ilə əməkdaşlığa görə sanksiyalarla üzləşəcəyi halda, Qərbin təzyiqinə nə dərəcədə dözə biləcəklərini öyrənmək istəyir:

"Bundan başqa, Rusiya ilə tərəfdaşlığın Çinə nə qədər zərər verə biləcəyini öyrənmək fikrindədirlər. Digər "Financial Times” nəşrində yayımlanan məqalədə, Çin rəsmilərinin iri bank rəhbərləriylə geniş müşavirə keçirdiyi yazılıb. Narahatlıq üçün əsas var. Çünki ABŞ rəsmiləri Pekinin dəfələrlə xəbərdar ediblər ki, Rusiya ilə əməkdaşlıqdan imtina etməsələr, Vaşinqton Çinə qarşı sanksiyalar tətbiq edəcək. Pekin bu təhlükədən qurtulmaq istəyir. Ancaq Pekin tərəfdaşı Rusiya ilə əməkdaşlıqdan da vaz keçə bilmir. Doğrudur, Çin Rusiyadan neft alışını azaltmaq barədə düşünür, ancaq digər sahələrdə əməkdaşlıq davam edir. Çin rəsmiləri müxtəlif ekspertlərlə həm də ona görə görüşüb fikir mübadiləsi aparırlar ki, Rusiyaya qarşı tətbiq edilən sanksiyaların xarakteristikasını özləri üçün müəyyənləşdirə bilsinlər”.

Politoloq vurğulayıb ki, Rusiya və Çin iqtisadiyyatları fərqlidir:

"Rusiya iqtisadiyyatı enerji daşıyıcılarının satışından asılıdır. Çin iqtisadiyyatı isə istehsal, ticarət və ixrac üzərində formalaşıb. Çinin Qərb ölkələri ilə ticarəti zəifləyərsə, məhsullarını ixrac etməkdə çətinliklərlə üzləşəcək, bu isə iqtisadiyyatın bütün sahələrinə mənfi təsir edəcək. Çin Rusiyadan fərqli olaraq dünya iqtisadiyyatına daha çox inteqrasiya olunub. Çinə qarşı sanksiyalar Qərb ölkələrinin özlərinə də mənfi təsir edəcək - inflyasiyanın artımı, dolların kursunun aşağı düşməsi və məhsulların qiymətlərinin artımı ilə müşahidə olunacaq. Çinin SWIFT sistemindən uzaqlaşdırılmasının mənfi təsirləri hesablanmağa başlanıb. Pekin bu ehtimalı hesablayaraq paralel bank ödəmə sistemi üzərində çalışmalar həyata keçirir”.