Sfera.az bildirir ki, bunu tanınmış həkim-radioloq Aydın Əliyev deyib. O, pandemiya dövründə tibb işçilərinə aylıq əmək haqlarına əlavələr ediləcəyi istiqamətində söz verildiyini, bunun təsdiqini tapmadığını bildirib:

"Bu baxımdan hələ ki, bu artım məvaciblərin bir neçə ay davamlı təsdiqini görməsək, inanmayacağıq. Tibb işçiləri təkcə həkimlərdən ibarət deyil. Çoxlu sayda tibb bacıları və eləcə də digər tibb işçiləri-köməkçi, texniki tibbi heyət var. Bu artımlar onların əmək haqqında öz inikasın necə tapacaq bəlli deyil. Tibbi xidmət komanda işidir, tək həkimdən asılı deyil. Təkliflər paketinin 2-ci bəndində bəzi ixtisas həkimlərinin aylıq əmək haqqlarının 20-90 % civarında artacağı bildirilir. Bu səhiyyə idarəçilərinin özlərinə bonus qazanması təklifidir. Yəni, bəzi geyim mağazalarında mövsümlə əlaqədar olaraq "70%-ə qədər endirim” yazsalar da, maraqlananda "70%-ə qədər yazılıb, amma soruşduğunuz məhsul cəmi 10% endirimə daxildir”, - deyə bildirirlər. Bu da onun kimi”.

Mütəxəssisin sözlərinə görə, deyilənlər həqiqət olsa, irəliyə doğru bir addım sayılacaq: "Olmasa, demək ki, növbəti yalançı PR-dır - tibb işçilərinin başını aldatmaq üçün”.

Digər tanınmış pediatr Vaqif Qarayev isə deyib ki, ixtisası siyahıda olmayanların narazılığını başa düşmək lazımdır:

"Xüsusən, cərrahlar və ginekoloqlar haqlıdır. Ona görə ki, bu ixtisas sahiblərinə cəmiyyətdə birmənalı münasibət yoxdur! Mən bura təcili yardım həkimlərini də əlavə edərdim. Çox ağır şəraitdə işləyirlər. Ümumiyyətlə, həkimə yüksək maaş verilməlidir ki, dolanmaq barəsində yox, sırf peşəsi barədə düşünsün”.

Qeyd edək ki, ötən gün İcbari Tibbi Sığorta üzrə Dövlət Agentliyinin sədri Zaur Əliyev qurumun fəaliyyəti ilə bağlı hesabatı təqdim edərkən, "Tibbi Ərazi Bölmələrini İdarəetmə Birliyi” publik hüquqi şəxsin tabeliyindəki tibb müəssisələrində çalışan səhiyyə işçilərinin əməyinin ödənilməsi Qaydası”na dəyişikliklər edilməklə 31 ixtisas üzrə çalışan həkimlərin aylıq əməkhaqlarının bütün məcburi tutulmalardan sonra tam məbləğinin 1000 manata çatdırılması nəzərdə tutulur”, - deyə bildirmişdi.