Fransa Rusiya ilə Ukrayna arasındakı danışıqlar prosesinin növbəti mərhələsinə nəzarət edə bilərmi? Türkiyə bu prosesdən kənarlaşdırılırmı?

Bununla bağlı Sfera.az-a açıqlama verən politoloq Məhəmməd Əsədullazadə deyib ki, Fransa prezidentinin növbəti mərhələdə Rusiya ilə Ukrayna arasında vasitəçi rolu oynaması və atəşkəsin əldə edilməsi istiqamətində atacağı addımlar uğursuz olacaq:

"Hesab edirəm ki, Makronun hələ əvvəlki prezidentlik dövründə vasitəçilik cəhdi alınmadı. Türkiyə prosesi ələ almağa çalışır. Fransa prezidenti isə onun prosesdən kənarlaşdırıması üçün bu addımı atmaq istəyir. Fransa Avropa İttifaqında yer alır və Aİ-nin təmsilçisi kimi sülhün imzalanması ilə bağlı gördüyü işlər nəticəsiz qalacaq”.

Müsahibimiz deyib ki, neytral ölkə konkret olaraq Türkiyədir:

"Onun bu proseslərə töhfə vermək iqtidarı var. Putin təbii ki, Makronu qəbul edəcək, təkliflərini dinləyəcək. Amma müəyyən ortaq məxrəcə gəlmələri mümkün deyil. Digər tərəfdən Putinlə Zelenskinin görüşü Ankara və ya İstanbulda reallaşa bilər. Düşünürəm ki, Fransanın Türkiyəni proseslərdən kənarlaşdırmaq səyləri nəticə verməyəcək”.