Elm adamları superbakteriya ilə bağlı həyəcan təbili çaldı: Ferma heyvanlarından keçir
Media
16:31 / 25.04.2022
1174
Elm adamları həyəcan təbili çalıb.
Sfera.az bildirir ki, tədqiqatçılar superbakteriyaların təhlükəli ştamının donuzlardan insanlara keçə biləcəyinə dair sübut tapıblar. Yeni kəşf fermalarda antibiotiklərdən çox istifadənin davamlı mikrobların yayılmasına səbəb olacağı ilə bağlı narahatlıq doğurub.
Danimarkadakı Statens Serum İnstitutundan Soren Persson, Kopenhagen Universitetindən Semeh Bejaoui və Dorte Freesin rəhbərlik etdiyi araşdırma latın adı "Clostridioides difficile” olan superbakteriyaya yönəldilib. Bejaouinin rəhbərlik etdiyi qrup ferma heyvanlarında "C. Difficile” xəstəliyinin yayılmasını araşdırıb. Donuzlar üzərində işləyən komanda Danimarkadakı xəstəxanalardan klinik nümunələr toplayıb və bakteriyanın insanlara keçib-keçmədiyini öyrənmək üçün onların məlumatlarını müqayisə edib.
"Tədqiqatımız göstərir ki, "C difficile” heyvanlar və insanlar arasında mübadilə edilə bilən antimikrob müqavimət genləri üçün bir anbar rolunu oynayır. Bu həyəcan verici kəşf antibiotik müqavimətinin əvvəllər düşünüldüyündən daha geniş yayıla biləcəyini göstərir və mal-qaradan insanlara keçə biləcəyini təsdiqləyir. Tədqiqatımızın aydınlaşdırdığı şey budur ki, antibiotiklərin istifadə edildiyi təsərrüfatlar davamlı ştamların inkişafına səbəb olan şərait yaradır", - deyə mütəxəssis bildirib.
Komanda öz nəticələrini Lissabonda Avropa Klinik Mikrobiologiya və Yoluxucu Xəstəliklər Konqresində təqdim edəcək.
Qeyd edək ki, sözügedən bakteriya inkişaf etmiş ölkələrdə antibiotiklərə qarşı müqavimət göstərən ən böyük təhlükələrdən biri hesab olunur. Bu bakteriya 2017-ci ildə ABŞ-da təxminən 223,900 infeksiyaya və 12,800 ölümə səbəb olub, səhiyyə sisteminə 1 milyard dollardan çox ziyan vurub.
Günay Rəsulqızı
Sfera.az
