Böyük kriptovalyuta soyğununda Kim Çen İn izi - Ballistik raketlər üçün pulu belə tapırmış…
Media
12:25 / 15.04.2022
1122
Şimali Koreyanın dəstəklədiyi hakerlər məşhur video oyunu "Axie Infinity” ilə əlaqəli olan Ronin şəbəkəsindən keçən ay yüz milyonlarla dollarlıq kriptovalyuta oğurlayıb.
Sfera.az xəbər verir ki, bu barədə məlumatı Amerika Federal Təhqiqat Bürosu (FTB) və ABŞ Maliyyə Nazirliyi yayıb.
Məlumata görə, hakerlərin istifadə etdiyi "Crypto Money” hesabının Şimali Koreyanın "Lazarus” və "APT38” haker qrupları tərəfindən idarə edildiyi müəyyən edilib.
Bu hadisə dünyada ikinci ən böyük kriptovalyuta soyğunu olaraq qeyd edilib.
ABŞ ordusunun keçən il açıqladığı hesabatda, ölkənin "Büro 121" adlı kiber müharibə birliyində 6 min adamın çalışdığı bildirilib.
ABŞ BMT Təhlükəsizlik Şurasının ilk növbədə "Lazarus” Qrupunu qara siyahıya salmasını və üzvlərinin aktivlərini dondurmasını istəyib. Bildirilir ki, artıq bununla bağlı qərar Şuraya təqdim olunub.
Qeyd edək ki, nüvə proqramına görə Birləşmiş Millətlər Təşkilatının (BMT) sanksiyasına məruz qalan Şimali Koreyanın uzun müddətdir kriptovalyuta birjalarını və saytlarını hədəf aldığı məlumdur. BMT-nin məlumatına əsasən, ölkənin "kripto oğurluqları” həm də nüvə və ballistik raket proqramları üçün əsas gəlir mənbəyidir.
Əzizə Zeynal
Sfera.az
