Quru sərhədlər açılacaq və Rusiyaya uçuşlar bərpa olacaq – AÇIQLAMA

 

Elə ailələr var ki, uçuşlar ləğv edilməmişdən əvvəl Azərbaycana gəzinti üçün gəlib, amma indi geri qayıda bilmir. Dövlət Sərhəd Xidməti vasitəsilə də quru yolla keçid üçün yalnız Rusiya vətəndaşlarına icazə verilir. Bu da yenə öz növbəsində vətəndaşlarımıza problem yaradır.

 

Maraqlıdır, yaxın zaman ərzində Rusiya ilə quru sərhədlərin açılması məsələsi reallaşa bilərmi? 

Mövzu ilə bağlı Sfera.az-a danışan deputat Cavanşir Paşazadə yaxın zaman ərzində Rusiyaya hava reyslərinin təşkil ediləcəyini və quru sərhədlərin açılacağını deyib:

"Pandemiya ilə əlaqədar olaraq artıq iki ildir ki, qonşu ölkələrlə quru sərhədlər bağlanıb. Xəstəliklə əlaqədar sərhədlərin açıq olması daha böyük problemlər yarada bilərdi. Karantin rejiminin yumuşaldılması istiqamətində hava reysləri mərhələli şəkildə bərpa olunsa da, quru sərhədlər təəssüf ki, açılmadı. Bu da öz növbəsində insanlar üçün müəyyən çətinliklər yaratdı və yaratmaqda davam edir. 

Rusiya ilə hava yollarının bağlı olması bizdən asılı olan məsələ deyil. Bəzi hallarda insanlar bunu anlamayaraq Azərbaycan tərəfini bu məsələdə təqsirkar bilirlər. Bu gün Rusiyada gedən proseslər, Ukraynada davam edən müharibə faktoru hava yollarının açılması üçün ciddi əngəldir. Lakin düşünürəm ki, yaxın zaman ərzində problemlər öz həllini tapacaq. Həm hava, həm də quru yollarının yaxın zamanlarda açılacağını düşünürəm”. 

Qeyd edək ki, quru yolla Rusiyaya keçid üçün vətəndaşların yaşadığı problemlərlə əlaqədar DSX-ə müraciət ünvanlasaq da, sualımız cavabsız qaldı.