Kombi sistemi ləğv oluna bilər? – AÇIQLAMA
Media
14:52 / 12.04.2022
2500
Ekologiya və Təbii Sərvətlər Nazirliyinin Dövlət Ekoloji Ekspertiza Agentliyinin sədri Mirsalam Qənbərov Bakıda fərdi istilik sistemlərinin mərkəzləşdirilmiş istilik sistemləri ilə əvəz olunması üçün bir neçə qurumla birgə təşəbbüs irəli sürdüklərini bildirib.
Nazirlik rəsmisi kombilərin ətraf mühitə ziyan vurduğunu diqqətə çatdırıb.
Maraqlıdır, yaxın gələcəkdə kombilərin ləğvi məsələsi reallaşa bilərmi? Ümumiyyətlə belə bir addımın atılması nə dərəcədə düzgündür?
Mövzu ilə bağlı Sfera.az-a danışan "Azəriqaz” İstehsalat Birliyinin sabiq idarə rəisi, Azad İstehlakçılar Birliyinin Kommunal xidmətlər üzrə eksperti Nüsrət Qasımov kombi sisteminin ekoloji mühitə ciddi mənada heç bir ziyan vurmadığını bildirib. Ekspert mərkəzləşdirilmiş istilik sistemlərinin bir neçə mənada kombilərdən daha zərərli olduğunu vurğulayıb:
"Bu təklifi irəli sürən şəxsin kim olduğunu bilmirəm, lakin görünən odur ki, həmin şəxsin kimya elmindən, qaz təsərrüfatından xəbəri yoxdur. Mərkəzi istilik sistemi hökumətə ən çox ziyan vuran sistemlərdən biridir. Çünki qaz turbaları çox köhnəlib. Dərnəgüldə qurulan istilik qazanxanası kilometrlərlə yol qət edərək əhalinin evinə çatır. Bu sistem 40-50 il qabaq quraşdırılıb və oradan axan sızmalar hər mənada ziyanlıdır. Sistemdən gələn istilik hardasa 30 dərəcə civarında olur ki, bu da insanları qane etmir. Ona görə də insanlar bu sistemə mənasız yerə pul ödəmirlər və məcbur qalıb başqa qızdırıcılardan istifadə edirlər. İstiliyin pulu ödənilmədiyi üçün həmin mərkəzlərin "Azəriqaz”a, "Azərişıq" ASC-ə, "Azəristilik” ASC-ə milyonlarla borcu yaranır.
Kombi ağıllı, ekonomik cihazdır. Bu cihaz saata 3 kub metr qaz işlədir. Bu havaya ziyan vurma baxımından çox aşağıdır. Açıq havada yanan qazın 50 faizi havaya gedir ki, bununla da karbomonoksid istehsal olunur. Kombilərin ekologiyaya ziyan vurması cəfəngiyyatdır”.
Müsahibimiz yeni istilik mərkəzləri üçün binaların həyətində əlavə yer ayırmağın mənasız olduğuna diqqət çəkib:
"Yeni istilik mərkəzlərinin qurulması üçün gərək binaların həyətində əlavə yerlər ayrılsın.18-20 mərtəbəli bina üçün istilik mərkəzlərinin yaradılması 60 metrdən çox ərazi tələbi edir. Belə olan halda da uşaqlara oynamaq üçün yer qalmır. İstilik qazanxanaları noyabrın 15-dən işə düşür və aprelin 15-dək işlək vəziyyətdə qalır. Sual olunur, qeyd olunan müddətdən əvvəl, yaxud sonra hava şəraiti kəskin dəyişərsə, insanlar nə etməlidir? Noyabrın 1-i qar yağsa, əhali yorğana bürünüb yatmalıdır? Buna görə də ən ağıllı sistem kombi sistemidir və bundan da hamı razıdır. Dövlət indi işğaldan azad olunan ərazilərdə quruculuq işləri ilə məşğul olmalıdır, mənasız sahələrə pul yatırmaq lazım deyil”.
Əzizə Zeynal
Sfera.az
