Jerar Depardyenin Rusiya vətəndaşlığı ləğv edilə bilər
Media
16:54 / 01.04.2022
1169
Rusiya Dövlət Dumasının deputatı Sultan Həmzəyev məşhur aktyor Jerar Depardyenin Rusiya vətəndaşlığının ləğv edilməli olduğunu deyib.
Sfera.az xarici mətbuata istinadən xəbər verir ki, deputat fransalı aktyorun daşınmaz əmlakının da müsadirə olunmasını təklif edib. Deputatın fikrincə aktyora Saransk və Qroznıda olmaqla hədiyyə edilən iki mənzil yetim uşaqlara verilməlidir.
Rusiya Prezidentinin mətbuat katibi Dmitri Peskov isə Depardyenin Ukraynada baş verənləri tam başa düşmədiyi fikrini irəli sürüb. "Lazım gələrsə, ona hadisələri danışıb izah etməyə hazıram”, - deyə Peskov bildirib.
Bir müddət əvvəl fransız aktyor Rusiya Prezidentinin əməllərinə görə rusiyalıların cavabdeh olmadıqlarını bildirmişdi.
Xatırladaq ki, Jerar Depardye 2012-ci ildə vergilərin artırılmasına etiraz etmiş, daha sonra da vergidən yayınmaqda ittiham olunduğu üçün Rusiyaya sığınıb. 2013-cü ildə Vladimir Putinin 1 nömrəli sərəncamı ilə fransalı aktyora Rusiya vətəndaşlığı verilib.
Aysel
Sfera.az
