Savaşın QARANLIQ MƏQAMLARI: Rusiya nümayəndə heyəti niyə Türkiyəni erkən tərk etdi?

 

Sfera.az bildirir ki, bunu siyasi şərhçi Şahin Cəfərli deyib. O, hələ də qaranlıq qalan xeyli önəmli məqamın olduğunu deyib:

"Məsələn, atəşkəs olacaqmı və nə vaxt? Rusiya təkcə Kiyev-Çerniqovdan deyil, digər ərazilərdən də çəkiləcəkmi ? Ümumiyyətlə, Rusiyanın bu açıqlamasına nə dərəcədə etibar etmək olar? Ukrayna ordusu Kiyev vilayətində fasiləsiz rejimdə ağır zərbələr vurduğu, 24 fevraldan bəri vilayətin şəhərlərini dağıdaraq  cinayətlər törədən işğalçıların oranı rahat tərk edib getməsinə tamaşa edəcək? Çünki bu qüvvələri Rusiya komandanlığı Donbas istiqamətinə göndərəcək və oradakı Ukrayna qruplaşmasının vəziyyəti daha da ağırlaşacaq.

Başqa bir tərəfdən, Rusiyanın Çerniqov-Kiyev istiqamətindən çəkilməsi buradakı kifayət qədər güclü və çoxsaylı Ukrayna hərbi qüvvələrini də sərbəstləşdirir və onların Donbasa, eləcə də ehtiyac olan digər istiqamətlərə göndərilməsinə imkan yaradır. Rusiya niyə bunda maraqlı olsun? Belə çıxır ki, tərəflər digər istiqamətlərdə döyüşü dayandırıb, yalnız Donbasda müharibə aparmağa razılaşır? Tutaq ki, Rusiya bütün Donbası işğal edib, regionun inzibati sərhədlərinə çıxsa, Ukrayna buna razı olub, müharibəni dayandıracaq? Yaxud əksinə, Ukrayna ordusu Donbasdakı mövcud mövqelərini əldən verməsə, hətta irəliləsə, Rusiya bunu qəbul edəcək? Yəni, Donbasdakı müharibənin hansı nəticələri tərəflər üçün məqbuldur? Anlamaq olmur”.

Ş.Cəfərli vurğulayıb ki, atəşkəs barədə hələ ki razılıq yoxdur və bu isə o deməkdir ki, savaş bütün istiqamətlərdə davam edir: "Rusiya nümayəndə heyəti artıq Türkiyəni tərk edib. Halbuki danışıqların bu gün də davam etdirilməsi nəzərdə tutulmuşdu”.