Ukrayna NATO-dan imtina edir? - Putin-Zelenski görüşü Türkiyədə baş tutarsa...

Bunu Sfera.az-a açıqlamasında Beynəlxalq Münasibətlər və Diplomatiya Araşdırmaları Mərkəzinin eksperti Kənan Novruzov İstanbulda Rusiya və Ukrayna nümayəndə heyətləri arasında keçirilən görüşdən danışarkən deyib. O bildirib ki, artıq Moskva ilə Kiyev də sülhə daha "isti" yanaşırlar:

"Rusiya iqtisadi təzyiqlər, sanksiyalar altında tədricən "boğulur". Ukraynanın isə gücü tükənməkdədir. Savaşın daha bir müddət davam edəcəyi təqdirdə, hər iki ölkədə etiraz dalğasının yaranması və ya mövcud narazılıqların artması gözləniləndir. Bu baxımdan prezidentlər səviyyəsində görüş həm Rusiyanın, həm də Ukraynanın maraqlarına uyğundur. Əsas məsələ isə ortaq məxrəcin tapılmasıdır. Müharibənin artıq bir aydır davam etdiyini nəzərə alsaq, deməli, tərəflər kifayət qədər prinsipial davranmağa çalışırlar. Buna baxmayaraq, güzəşt üçün də yer var”.

"Onsuz da NATO-ya üzvlük indiki halda müşkül məsələdir. Üstəgəl, Zelenski bu barədə bir neçə oxşar fikirlər səsləndirib. Həmçinin, Krım məsələsində müəyyən güzəştlər ola bilər. Podolyak dünən bu haqda danışarkən referendum keçiriləcəyinin anonsunu verib. Lakin, əlbəttə, bunlar qarşılıqsız olmayacaq - əvəzində Rusiyanın Ukraynadan çıxması tələb olunacaq. Eyni zamanda, Moskvanın Kiyevin daxili işlərinə qarışmayacağına dair öhdəlik tələb oluna bilər. 

 

Qeyd etdiyim kimi, Krım məsələsində Rusiyaya müəyyən güzəştlər oluna bilər, lakin bu, heç bir halda Ukraynanın məğlubiyyəti kimi qiymətləndirilməməlidir. Əksinə, indi olduğu kimi, yaxın gələcəkdə, müharibə bitəndən sonra da Rusiyanın işi daha çətin olacaq. Kreml sanksiyaların hələ sadəcə "nəfəsini" hiss edir”.

"Dövlət başçılarının (Putin və Zelenski) məhz Türkiyədə görüşəcəyi gözlənilir. İstənilən halda, Ərdoğanın rəhbərliyi ilə qardaş ölkə vasitəçilik təşəbbüslərini davam etdirir. Əgər Türkiyə lideri bunu bacarsa, təkcə Rusiya və Ukraynanın deyil, həm də planetin xilaskarına çevriləcək, Qərbin məkrli oyununu isə pozacaq”.