Mərkəzi Bank FES-in qərarından sonra hansı addımı atacaq? – Deputat açıqladı

Sfera.az-ın məlumatına görə, bununla bağlı iqtisadçı-deputat Vüqar Bayramov Rusiya-Ukrayna müharibəsi səbəbindən Böyük Britaniyada inflyasiya səviyyəsinin yayadək 8 faizədək yüksələcəyinin gözlənildiyinin bildirib.

Onun sözlərinə görə, Avropa Mərkəzi Bankı uçot stavkasının artırılmasına tələsməsə də, avrozonada aylıq inflyasiya səviyyəsi ötən ay 5.9 fazədək yüksəlib:

"Bununla belə, ekspertlər avrozonada da uçot dərəcəsinin tezliklə dəyişdiriləcəyini istisna etmirlər. Digər tərəfdən FES-in son qərarı dolların məzənnəsini əksər səbət valyutalarına nisbətən yüksəldib. Rusiya-Ukrayna müharibəsi region ölkələrinin valyutalarına da təsirsiz ötüşməyib.  Görünən odur ki, 2022-ci il əksər ölkələr üçün inflyasiyanı tənzimləmək və milli valyutaları qorumaq baxımından heç də asan olmayacaq. Rusiya-Ukrayna müharibəsi hələ çox dəngələri dəyişəcək”.

Millət vəkili həmçinin vurğulayıb ki, Azərbaycan Mərkəzi Bankı Ukraynada müharibə başladıqdan sonra uçot dərəcəsini dəyişdirilməsi barədə qərar verməyib:

"Rublun kəskin ucuzlaşması, region ölkələrinin valyuta bazarında müşahidə edilən dalğalanmalar və eləcə də qlobal inflyasiya səviyyəsinin kəskin artdığı bir dövrdə Mərkəzi Bank tərəfindən də preventiv addımların gücləndirilməsi və xüsusən uçot dərəcəsi kimi alətlərdən daha intensiv istifadə edilməsi məqsədəuyğundur”.

Qeyd edək ki, FES-in əvvəlki faiz artımı 2018-ci ilin dekabrında olub və o vaxtdan bəri baza faiz dərəcəsi yalnız azalıb. 

Günay Rəsulqızı