Rusiya “Ukrayna planı”nı həyata keçirsə... - MDB ölkələrini gözləyən BÖYÜK TƏHLÜKƏ

 

Bunu Sfera.az-a açıqlamasında Ağ Partiyanın sədri Tural Abbaslı deyib. Müsahibimiz bildirib ki, Azərbaycanın postsovet məkanı ölkələrindən biri olduğunu nəzərə alsaq, Ukrayna-Rusiya müharibəsi bizə digər Avropa ölkələrindən daha çox təsir edir:

"İstənilən halda, Rusiyanın zəifləməsi, imic itirməsi və yaxud ordusunun itki verməsi, siyasi elitasının dünyada nüfuzdan düşməsi Azərbaycana sərf edir. Çünki ən azı Qarabağ münaqişəsində Azərbaycanın tammənalı olaraq, birdəfəlik bu problemi həll etməsində əsas maneə olan ölkələrdən biri Rusiyadır. Odur ki, Rusiyanın zəifləməsi və Ukraynadan məğlub olaraq çıxması ölkəmizə sərfəlidir. Sərf etməsə belə, biz işğalçı siyasətin əleyhinə olmalıyıq və suveren ölkənin ərazisinə müdaxiləni pisləməliyik. Əgər bu gün Ukraynanın ərazisinə girirlərsə və orada işğalçılıq siyasəti aparırlarsa, buna müxtəlif adlarla don geyindirirlərsə, sabah eyni hərəkəti Azərbaycana qarşı da edə bilərlər. Unutmayaq ki, Azərbaycanın da Rusiya ilə sərhədləri mövcuddur – eyni bəhanələrlə Rusiya Azərbaycana da gələ bilər”.

T.Abbaslı Rusiyanın müharibədə qalib gələcəyini düşünmədiyini vurğulayıb:

"Ola bilsin ki, Rusiya Kiyev şəhərini işğal edə, rejimi dəyişə, xalqın seçdiyi iqtidarı – Zelenskini hakimiyyətdən göndərə , özünə yaxın bir adamı təyin edə bilər. Yaxud Ukraynanın zamanında Almaniyanın qərbə və şərqə bölünməsi kimi məsələ ortaya qoyula, separatçı ocaqların sayı artırıla bilər. İstənilən halda, Rusiya bu müharibədən məğlub çıxıb – imicinə böyük zərər dəyib, uzunmüddətli Rusiyanı dizüstə çökdürəcək sanksiyalar tətbiq olunub və s. Düzdür, bu sanksiyaların nə qədər davam edəcəyi məlum deyil, amma hər halda, iqtisadi baxımdan ölkəyə kifayət qədər ziyan vurub. Bütün bunları nəzərə alsaq, Rusiya Ukraynanı işğal etsə belə məğlubdur. Burada məsələni nisbətən fərqli edən Türkiyənin Azərbaycanın yanında olmasıdır. Çünki Rusiya "Ukrayna planı”nı həyata keçirsə, bir versiya da var ki, digər MDB dövlətlərini də nəzərdən keçirəcək, orda da nələrsə etmək istəyəcək. Amma Azərbaycana məcburdur ki, fərqli yanaşsın, bizim Türkiyə kimi müttəfiqimiz var”.