Sfera.az bildirir ki, sosial platformalar Rusiyaya qarşı nifrət dolu çıxışları yayımlayacağını açıqlayıb. Belə ki, normal şəraitdə sözügedən şəbəkələr müəyyən irqə, bəlli bir qrupa və ya ölkənin insanlarına yönəlmiş ayrı-seçkilik xarakterli yazıları məhdudlaşdırır və silir, eyni zamanda bu cür paylaşımlar edənlərin  hesablarını bağlayır. 

"Facebook” illərdir davam etdirdiyi bu siyasəti müvəqqəti olaraq dayandırmaq və Rusiyaya qarşı "nifrət ehtiva edən yazıları” yayımlamaq qərarına gəlib.

Qərara əsasən, "rus işğalçılarına ölüm” kimi sözlərin paylaşılması bundan sonra platformalar tərəfindən bloklanmayacaq. "Facebook” və "Instagram”ın sahibi olan Mark Zukerberqin bu qərarı dərhal böyük müzakirələrə səbəb olub.

"Rusiyanın Ukraynaya təcavüzü nəticəsində biz müvəqqəti olaraq qaydalarımıza zidd olan "Rusiya işğalçılarına ölüm” kimi siyasi bəyanatlar yayacağıq. Bununla belə, biz Rusiyanın mülki əhalisinə qarşı zorakılıq çağırışlarına məhəl qoymağa və qadağan etməyə davam edəcəyik”. 

Xəbər agentliklərinin məlumatına görə, yeni qərar Ermənistan, Azərbaycan, Estoniya, Gürcüstan, Macarıstan, Latviya, Litva, Polşa, Rumıniya, Rusiya, Slovakiya və Ukraynanı əhatə edir. Bu məlumatın məzmun menecerlərinə göndərilən elektron məktublardan əldə edildiyi bildirilib. "Meta” şirkəti isə hələlik coğrafi sərhədlərin daha hansı ölkələri əhatə edəcəyini açıqlamayıb və bu mövzuda sualları cavabsız qoyub.

"Facebook” və "Instagram”ın Rusiyaya qarşı bu cür münasibət bəslədiyi bir vaxtda, Rusiya da oxşar sosial media platformalarının ölkə daxilində istifadəsini məhdudlaşdırmağa başlayıb. Ölkədə demək olar ki, bütün Qərb əsaslı sosial media platformaları, xüsusilə "Twitter" və "Facebook" qadağan edilib.

Qeyd edək ki, Mark Zukerberqin şirkəti əvvəllər də oxşar vəziyyətlərdə qəbul etdiyi bu cür qərarlara görə çətinliklərlə üzləşib. 2021-ci ilin iyulunda İranda keçirilən etirazlarda şirkət eyni qərarı verib - İranın ali dini lideri Ayətullah Əli Xamenei üçün hazırlanmış "Ayətullah Əli Xameneiyə ölüm” postlarına müvəqqəti icazə verilib.