Respublikaçı senatorlar Baydenə məktub ünvanladılar: "Ukraynaya döyüş təyyarələri göndərək"
Media
10:40 / 11.03.2022
963
ABŞ-da 42 respublikaçı senator prezident Co Baydenə müraciət edib.
Sfera.az bildirir ki, senatorlar Ağ Ev sahibinə məktub göndərərək Ukraynaya daha konkret müdafiə yardımı göstərməyə çağırıblar. Onlar ABŞ-ın Polşa və digər NATO ölkələri ilə əməkdaşlıq edərək, sözügedən ölkəyə döyüş təyyarələri göndərilməsini istəyiblər.
Coni Ernst və Mitt Romney başda olmaqla, senatorlar məktubda Baydenin Ukraynaya müdafiə yardımını alqışladıqlarını, lakin administrasiyanın Ukraynaya təcili ehtiyacı olan döyüş təyyarələri göndərməkdə qeyri-adekvat olduğunu bildiriblər:
"Biz indiyədək Ukraynaya göndərdiyiniz silahlarla bağlı rəhbərliyi yüksək qiymətləndiririk, lakin Polşanın döyüş təyyarələrini Ukraynaya çatdırmaq variantını rədd etmək qərarınızla qəti şəkildə razılaşmırıq”.
Qeyd edək ki, Ukraynaya döyüş təyyarələri göndərilməsi ilə bağlı ABŞ və Polşa arasında fikir ayrılığı yaranıb. Polşa müvafiq döyüş təyyarələrini birbaşa Ukraynaya verə bilməyəcəyini, lakin bu təyyarələri ABŞ-ın Almaniyadakı bazasına çatdırmağa hazır olduğunu bəyan edib. ABŞ isə bu variantı qəbul edə bilməyəcəyini açıqlayıb.
Günay Rəsulqızı
Sfera.az
