Rusiya iqtisadiyyatının çöküşü Azərbaycana necə təsir edəcək? - "Manatın sabitliyi pozula bilər"
Media
10:35 / 11.03.2022
974
"Rusiyaya qarşı tətbiq edilən görünməmiş sanksiyalar ölkəni tənəzzülə sürükləyib. Bizim proqnozumuza görə, bu tənəzzül dərin olacaq. Defolta gəlincə, bu ssenari artıq qeyri-mümkün görünmür".
Bunu Beynəlxalq Valyuta Fondunun icraçı direktoru Kristalina Georgiyeva CNBC telekanala açıqlamasında bildirib.
Maraqlıdır, Rusiya iqtisadiyyatı ilə bağlı vəziyyət hansı ölkələrə təsir edəcək? Proses Azərbaycan manatına da təhlükə yarada bilərmi?
Sfera.az-ın məlumatına görə, bununla bağlı iqtisadçı-alim Qubad İbadoğlu deyib ki, Rusiya özü ilə bərabər onun orbitində olan ölkələri də tənəzzülə sürükləyəcək:
"Fikrimcə, Rusiya iqtisadiyyatının hazırkı vəziyyəti birinci növbədə Avrasiya İttifaqına üzv ölkələri - Belarusu, Ermənistanı, Qırğızıstanı və Qazaxıstanı - təsirləndirəcək. Bundan sonra Rusiyada böhranın ikinci dərəcədə təsirləndirdiyi ölkələr Tacikistan, Özbəkistan, Türkmənistan və hazırkı siyasəti davam etdirərsə, Azərbaycan da ola bilər. Odur ki, Azərbaycan höküməti Rusiyaya sanksiyaların tətbiqindən sonra regionda formalaşan yeni meylləri, qərarlaşan tendensiyaları müxtəlif ssenarilər üzrə qiymətləndirməli və qısa müddət ərzində adekvat proqramlar qəbul etməlidir”.
İqtisadçı, həmçinin qeyd edib ki, Rusiya sərmayəsi olan banklar və şirkətlərlə bağlı vəziyyətə aydınlıq gətirməlidir:
"Eyni zamanda bankların son günlər valyuta mübadiləsi ilə bağlı manipulyasıyalarının (bəzi banklar son günlər dollar alırlar, satmırlar, rubl almırlar, satırlar), ölkədən valyuta çıxarılmasının qarşısı alınmalıdır. Yoxsa Azərbaycanda ayrıca rus bankları və şirkətləri defolt ola və manatın kövrək sabitliyi pozula bilər”.
Günay Rəsulqızı
Sfera.az
