ABŞ-dən neft bazarını sirkələyəcək həmlə: Qiymət 200 dollara yüksələ bilər!
Media
11:31 / 09.03.2022
1455
ABŞ Prezidenti Co Bayden canlı yayımda çıxışı zamanı ölkəsinin Rusiyadan neft idxalını dayandırdığını deyib. Rəsmi Vaşinqton bənzər qərarın avropalı müttəfiqləri tərəfindən də verilməsini gözlədiyini bildirib.
ABŞ və müttəfiqlərinin enerji sanksiyası Ukrayna-Rusiya müharibəsində nəyi dəyişəcək?
Mövzu ilə bağlı Sfera.az-a açıqlama verən Milli Məclisin deputatı Vüqar Bayramov deyib ki, bu addım dünya bazarında neftin qiymətindəki artımı daha da sürətləndirəcək.
"Ağ Ev Rusiyadan təkcə xam nefti deyil, həm də bütün enerji məhsullarının idxalını dayandırır. ABŞ-nin ən yaxın müttəfiqi olan Böyük Britaniya ilin sonunadək Rusiya nefti ilə vidalaşmağı düşünür. Bu zamanadək Böyük Britaniya alternativ mənbələr tapmağa çalışacaq.
"Brent" markalı neftin 1 barelinin qiyməti 130 dollardan baha təklif olunur. Sanksiyalar qüvvəyə mindikdən sonra neftin qiymətinin 150 -200 dollaradək yüksəlməsi çox zaman almayacaq”.
V. Bayramovun sözlərinə görə, ABŞ və Səudiyyə Ərəbistanından sonra dünyada üçüncü ən böyük hasilatçı olan Rusiya qlobal bazara gündəlik 5 milyon barel neft çıxarır:
"ABŞ üçün Rusiya neftindən imtina qərarı elə də çətin deyildi. Çünki Rusiya Birləşmiş Ştatları neft idxalında cəmi 3 faiz paya malikdir. Rusiya enerji ixracatının 50 faizi isə Avropanın payına düşür. Bu baxımdan, Avropada Rusiyadan gələn neft borularını bağlamaq üçün zaman lazımdır.
Birləşmiş Ştatların isə OPEC-dən və xüsusən də Səudiyyə Ərəbistanından neft hasilatını artırmağı istəyəcəyi gözlənilir. Qərb daha qısa zamanda Rusiya neftinə alternativ tapmağa çalışır. Əks addım olaraq Rusiyanın da Avropaya mavi qaz nəqlinin dayandırması da istisna deyil. Avropa qaz idxalının 40 faizini hələ də Rusiyadan alır. Bütün hallarda görünən odur ki, bu həftə birjalarda ciddi çalxalanmalar olacaq. Dünya iqtisadiyyatı da yeni dönəmə daxil olur. İnflyasiyanın sürətlənəcəyi bu dönəmdə "İngilis qaydaları” prosesləri diktə etməkdədir”.
Turan Rzayev
