İki ayda qeyri-neft ixracı 40 faiz artıb
Media
17:16 / 05.03.2022
1368
2022-ci ilin yanvar-fevral ayları ərzində Azərbaycanın ixracı 6 milyard dollar, qeyri-neft sektoru üzrə ixracı 461,8 milyon dollar olub.
Sfera.az bildirir ki, qeyri-neft sektoru üzrə ixrac 2021-ci il ilə müqayisədə 130,6 milyon dollar və ya 39,4% artıb.
2022-ci ilin meyvə-tərəvəz məhsulları ötən ilin eyni dövrü ilə müqayisədə 21,9 milyon dollar artaraq 92,3 milyon dolları təşkil edib. Müvafiq dövr ərzində kimya sənayesi məhsullarının ixracı 9 dəfə, alüminium və ondan hazırlanan məmulatların ixracı 57,4%, pambıq lifi ixracı 38,3%, pambıq ipliyi ixracı 35,2%, qara metallar və onlardan hazırlanan məmulatların ixracı 16,5% artıb.
Normallaşma prosesinin davam etdiyi dövrdə 2022-ci ilin fevral ayı üzrə ixrac 2,9 milyard dolları təşkil edib. Fevralda qeyri-neft sektoru üzrə ixracda artım 24% təşkil etməklə 229,6 milyon dollar olub.
2022-ci ilin fevral ayı ərzində yeyinti məhsulları üzrə ixrac ötən ilin müvafiq ayı ilə müqayisədə 19,4% artaraq 51,7 milyon dolları, qeyri-yeyinti məhsulları üzrə isə 25,4% artaraq 177,9 milyon dolları təşkil edib.
Vasif
Sfera.az
