Bəs, ukraynalı qaçqınlar hansı ölkələrə qaçırlar?

Sfera.az bildirir ki, son məlumatlara əsasən, həmin qaçqınlar Polşa, Rumıniya, Slovakiya, Macarıstan və Moldova kimi ölkələrə, eyni zamanda Rusiya və Belarusa da gedirlər. Artıq Ukraynadan bu ölkələrə 1 002 860 nəfər daxil olub.

Polşa indiyədək 505 582 qaçqını qəbul edib. Yaralı ukraynalıları daşımaq üçün tibbi qatar təşkil edən ölkə, onları yerləşdirmək məqsədilə 1 230 xəstəxananın da siyahısını hazırlayıb. Son illərdə, xüsusən də Rusiyanın Krımı ilhaq etdiyi 2014-cü ildən bəri bir milyondan çox ukraynalı Polşada məskunlaşıb.

Qeyd edilən digər ölkələrə sığınan ukraynalı vətəndaşların sayı ilə bağlı vəziyyət isə belədir:

Macarıstan - 139.686

Moldova - 97 827

Slovakiya - 72,200

Rumıniya - 51.261

Rusiya - 47.800

Belarusiya – 357 nəfər.

88 147 nəfər bu ölkələrdən Avropaya köçüb.

Məlumata görə, Ukraynadan qaçan şəxslərə qonşu ölkələrə getmək üçün sənədlərə ehtiyacın olmadığı deyilsə də, onların daxili və ya xarici səyahət pasportları, onlarla səyahət edən uşaqların doğum haqqında şəhadətnamələri və tibbi sənədləri olmalıdır. Qaçqın statusu almaq üçün isə onlar Ukrayna vətəndaşı və ya Ukraynada qanuni yaşayan insanlar, məsələn, əcnəbi tələbələr olmalıdırlar.

BMT-nin hesablamalarına əsasən, hazırda Ukraynada müharibədən qaçan və öz ölkəsində didərgin düşmüş ən azı 160 min insan var. Avropa İttifaqı hesab edir ki, bu rəqəm 7 milyona çata bilər. Qurum bununla yanaşı, 18 milyon ukraynalının müharibədən təsirlənəcəyini qeyd edib.

 

AB-nin Böhran İdarəetmə komissarı Janez Lenarçiç "Bu rəqəmlər təxmini də olsa, böyükdür və biz bu cür fövqəladə vəziyyətə hazırlaşmalıyıq", deyə bildirib. BMT-nin Qaçqınlar üzrə Ali Komissiyası isə məcburi köçkünlərə kömək etməyə çalışdığını, lakin müharibə vəziyyətinə görə qurumun əməkdaşlarının Ukrayna ətrafında hərəkətinin təhlükəli olduğunu vurğulayıb.  

Aİ və Fransa rəsmilərinin sözlərinə görə, qurum müharibədən qaçan ukraynalılara 27 ölkədə üç ilə qədər qalmaq və işləmək hüququ verməyə hazırlaşır. Onlar, həmçinin sosial rifah və uşaqlar üçün mənzil, müalicə, o cümlədən məktəbə çıxış əldə edəcəklər. Bu, 1990-cı illərdə Balkanlardakı müharibədən sonra tərtib edilmiş, lakin indiyədək heç vaxt istifadə olunmayan Aİ-nin qaçqınlar üçün müvəqqəti müdafiə direktivinə uyğundur.