Bakı nəqliyyatında yenilik: Elektriklə işləyən avtobuslar nə vaxt istismara veriləcək?

Hazırda dünyanın bir çox ölkəsində elektrik mühərrikli nəqliyyat vasitələrindən istifadə olunur.

Xüsusən də ictimai nəqliyyat üçün elektrikli avtobuslardan istifadə edən ölkələrin sayı getdikcə artır. Bu isə öz növbəsində başadüşüləndir. Çünki bunun bir çox müsbət cəhəti var. Belə ki, elektrik mühərrikli nəqliyyat vasitələri ekologiyanı çirkləndirmir, ətraf mühit üçün olduqca faydalıdır. Nəzərə almaq lazımdır ki, son illərdə havanın çirklənməsi pik həddə çatıb. Ənənəvi avtobuslar yerinə elektrikli avtobusların şəhərdə fəaliyyət göstərməsi isə havanın təmizliyinin qorunmasında da müstəsna rol oynayır. Bütün bunlarla yanaşı, məsələnin maddi tərəfindən də bəhs etmək lazımdır. Yəni sözügedən avtobuslar çox az xərc tələb etdiyi üçün gediş haqları da münasib olur. Son günlərdə ölkəmizdə ictimai nəqliyyatlarda gediş haqqının artırıla biləcəyi ilə bağlı iddialar səsləndiyini də unutmayaq. Təbii ki, bu iddialar və tələblər sərnişənlərin narazılığına səbəb olur. Çünki onsuz da, vaxtlı-vaxtında gəlməyən və tutumundan çox sərnişin danışıdığı üçün tənqid olunan avtobus şirkətləri indi də qiymət artımından söz edirlər. Əslində, bu işin həlli də bəsit ola bilər. Bunun üçün ən yaxşı yol heç şübhəsiz ki, Azərbaycana elektrik mühərrikli avtobusların gətirilməsi ola bilər.

Maraqlıdır, Bakıda elektriklə işləyən avtobuslar nə vaxt istismara veriləcək?

Nəqliyyat məsələləri üzrə ekspert Elməddin Muradlı bildirib ki, bu layihə artıq Azərbaycanda müzakirə olunur:

"Ümid edirəm ki, yaxın vaxtlarda ilkin addımlar atılacaq. Düzdür, həmin avtobusların qiyməti xeyli bahadır, amma onların Azərbaycanda istismarı hər kəsin arzusudur. Çünki demək olar ki, hazırkı avtobuslar gün ərzində dayanmadan işləyirlər. Üstəlik onlar istər səs, istərsə də zəhərli qaz baxımından ətraf mühitə çox zərər vurur.

Lakin Bakı Nəqliyyat Agentliyi tərəfindən dünyanın inkişaf etmiş ölkələrində istehsal olunan avtobuslara maraq göstərilir. Hətta bildiyim qədərilə, bir neçə şirkətlə danışıqlar aparılır və ən əlverişli şərtlər daxilində həmin avtobusların Azərbaycana gətirilməsi nəzərdə tutulur. Amma bundan əvvəl infrastruktur layihələri həyata keçirilməlidir. Yəni elə olmalıdır ki, sözügedən avtobuslar gətirilməzdən əvvəl onların elektrik doldurma məntəqəsi, servis xidməti və s. məsələlər öz həllini tapmalıdır. Bununla da, avtobuslar gətirilən kimi dərhal istismara buraxıla bilər". Ekspert qeyd edib ki, dünyanın inkişaf etmiş ölkələri öz nəqliyyat siyasətlərini bu istiqamətdə qurublar: "Yəni ətraf mühitin qorunması üçün ekoloji təmiz nəqliyyat vasitələri istimar edilir. Xüsusən də ictimai nəqliyyatda bu tip addımların atılması nəzərdə tutulur. Ölkəmiz də artıq bu prosesdə iştirakını göstərib və müəyyən addımlar atıb. Sıxılmış qazla işləyən avtobusların gətirilməsi də buna bir nümunədir. Ümumiyyətlə, elektrik mühərrikli avtobusların Azərbaycanda istimarı arzuolunandır. Yəqin ki, təbiətin və ekologiyanın çirklənməməsi, havanın təmiz olması üçün bu layihələr tezliklə gerçəkləşəcək".