"Vaxtilə Berlin divarı var idi, bu gedişlə Kiyev divarı da olacaq!" - ŞƏRH
Media
15:32 / 02.03.2022
1441
"Qərb Ukraynaya dəstəyini artırmasa, bu ölkə İkinci Dünya müharibəsi sonrası Almaniyanın aqibəti ilə üzləşə bilər. Yəni Rusiya Dnepr çayı sərhəd olmaqla, yeni bir slavyan dövləti yarada, hətta Kiyevi tən ortadan bölən yeni bir Berlin divarı, əslində isə Kiyev divarı çəkə bilər”.
Bu sözləri Rusiyanın Ukraynaya hərbi təcavüzü Qərbin dəstəyinin olmayacağı təqdirdə yaranacaq şəraiti şərh edən politoloq Qabil Hüseynli Sfera.az-a açıqlamasında deyib.
Onun sözlərinə görə, Ukrayna xalqının inadlı müqaviməti Kremli daha aqressiv davranmağa vadar edir:
"Ukrayna-Rusiya müharibəsi günlərdir davam edir. Qərbin dəstəyi sonrası döyüş əzmi artan Ukrayna xalqı Rusiyaya qarşı inadlı müqavimət göstərir. Proseslərin hazırkı mərhələsi onu deməyə əsas verir ki, rəsmi Kiyev rus işğalı ilə barışmadığı kimi Qərbin dəstəyi ilə Rusiyanı geri çəkilməyə məcur etmək istəyir.
Mövcud vəziyyət Rusiyanın əleyhinədir. Bunu rəsmi Moskvanın son günlər aqressiv hücumları da təsdiq edir. Kreml indiki halda geri çəkilə bilməyəcəyini bildiyi üçün bütün gücü ilə hücumlara dəstək verib ən qısa zamanda Kiyevi təslim olmağa məcbur etmək istəyir”.
Politoloq hesab edir ki, Ukrayna müharibəsinin uzanması yekunda bu ölkənin İkinci Dünya müharibəsi sonrası Almaniya kimi iki hissəyə parçalanması ilə nəticələnə bilər:
"Rusiya Ukraynanın NATO və Avropa Birliyinə qoşulması ilə razı ola bilməz. Ukrayna da öz növbəsində Donbas, Luqansk, Krımın Ukraynadan alınması ilə razı olmayacaq. Ukraynanın tarixini bilənlərə bəllidir ki, İkinci Dünya müharibəsində faşistlər Ukraynanı bütövlükdə işğal edə bilməmişdi. Aydın məsələdir ki, Rusiya da bunu edə bilməyəcək. Rəsmi Moskva Ukraynanı ya biabırçı məğlubiyyətlə tərk edəcək, ya da bu ölkəni Almaniyada etdiyi kimi iki yerə bölüb yeni bir dövlət yaradacaq”.
Turan Rzayev
