Xarici ticarət gəlirimiz 2,5 dəfə artıb – manatın sabitliyi bir qədər də güclənəcək
15:39 / 19.02.2022
1090
Neftin bahalaşması Azərbaycanın xarici ticarət əməliyyatlarında, xüsusən də ixracda və ticarət saldosunda müsbət dəyişikliklərə səbəb olur. "Qara qızıl”ın dəyərinin yüksəlməsi hesabına bu ilin ilk ayında ixrac gəlirlərimiz 1,9 dəfədən çox, ticarət saldosunun profisiti 2,5 dəfədən çox artıb.
Sfera.az Dövlət Gömrük Komitəsinin açıqladığı məlumatlara istinadən xəbər verir ki, yanvarda xarici ticarət dövriyyəsi 4,061 milyard dollar, o cümlədən ixrac 3,086 milyard dollar, idxal 975 milyon dollar, xarici ticarət saldosunun profisiti 2,11 milyard dollar təşkil edib.
Müqayisə üçün bildirək ki, 2021-ci ilin yanvarında ixracımız 1,62 milyard dollar, idxal 787 milyon dollar, ticarət saldosunun profisiti 836 milyon dollar idi.
Bu il idxalda 16,6 faiz artım olub. Lakin ixracın 90 faizdən çox artması sayəsində xarici ticarətdə xalis mədaxil 1,32 milyard dollar təşkil edib.
Neftin bahalaşması hesabına Azərbaycanın ixracında neft-qaz sektorunun payı da yüksəlib. Ötən ilin yanvarında ixracın 91 faizi neft-qaz sektorunun payına düşürdüsə, bu ilin yanvarında ixracın 92,5 faizi neft-qaz məhsullarından ibarət olub.
Qeyd edək ki, neftin qiymətinin yüksəlməsi təbii qazın və neft məhsullarının da dəyərini artırdığından neft-qaz sektoru üzrə ixrac dəyəri yüksəlir. Bu hal xarici ticarətdə profisitin məbləğini bir qədər də artırır.
Azərbaycanın xarici ticarətində profisitin məbləğinin kəskin artması əhəmiyyətlidir. Profisitin böyüməsi cari hesablar balansında, həmçinin tədiyə balansında müsbət dəyişikliklərə səbəb olacaq və bu, maliyyə sabitliyinə, o cümlədən manatın məzənnəsinin sabit qalmasına kömək edəcək.
Vasif
