Baha neftin daha bir faydası – Rusiya Azərbaycandan kənd təsərrüfatı mallarının idxalını artırır
12:22 / 19.02.2022
1141
Azərbaycan 2022-ci ilin yanvarında kənd təsərrüfatı mallarının ixracında kəskin artıma nail olub.
Sfera.az Aqrar Tədqiqatlar Mərkəzinə istinadən xəbər verir ki, yanvarda ixrac edilən kənd təsərrüfatı mallarının dəyəri 80,5 milyon dollara yüksəlib. Bu, 2021-ci ilin yanvarındakı göstəricidən (52,2 milyon dollar) 28,3 milyon dollar, yəni 54,2 faiz çoxdur.
Azərbaycandan xaricə ən çox satılan kənd təsərrüfatı malları meyvələr, pambıq mahlıcı və tərəvəzlər olub.
Bu ilin yanvarında ixrac edilən meyvələrin dəyəri 37,4 milyon dollar (ötən ilin yanvarında 28,6 milyon dollar), meyvələrin miqdarı 30,5 min ton (əvvəlki ilin yanvarında 25,9 min ton) təşkil edib. 2022-ci ildə meyvə ixracı dəyər ifadəsində 31 faiz, miqdar ifadəsində 18 faiz artıb.
Pambıq mahlıcı ixracı ilk ayda 22,2 milyon dollara (14,3 milyon dollar) yüksəlib və dəyər ifadəsində 55,5 faiz artım qeydə alınıb. İxrac etdiyimiz pambığın miqdarı isə 10,2 min ton (10,3 min ton) olub ki, bu da 1,5 faiz azalma deməkdir.
Tərəvəz ixracı dəyər ifadəsində 83 faiz artaraq 15,4 milyon dollara, miqdar ifadəsində 57 faiz artaraq 13,3 min tona yüksəlib.
Adıçəkilən məhsullar kənd təsərrüfatı ixracının 93,2 faizini təşkil edib.
Bunlardan başqa ölkəmiz 2,2 milyon dollar dəyərində tütün xammalı, 1,6 milyon dollar dəyərində gön-dəri, 1,1 milyon dollar dəyərində arpa, 0,6 milyon dollar dəyərində heyvandarlıq məhsulları da satıb. Heyvandarlıq məhsullarına ət, süd və qaymaq, yun, təbii bal, xam ipək və diri heyvanların dəyəri daxildir.
Məlumatlardan aydın olur ki, kənd təsərrüfatı məhsullarının ixracında kəskin artımın əldə edilməsi daha çox bahalaşma ilə bağlıdır. Məhz bu səbəbdən dəyər ifadəsində ixrac miqdar ifadəsi ilə müqayisədə daha böyük nisbətdə artıb. Hətta pambıq mahlıcda satış miqdarının azalmasına baxmayaraq satışdan əldə edilən gəlir 55 faizdən çox olub.
Ümumilikdə, son bir ildə dünyada kənd təsərrüfatı məhsullarında nəzərəçarpacaq bahalaşma müşahidə edilir. Sürətli bahalaşmada isə neftin və digər enerji daşıyıcılarının qiymətinin kəskin artmasının böyük rolu var.
Neft və qazın bahalaşması məhsulların dəyərini artırmaqla yanaşı, bəzi ölkələrdə daxili tələbi də gücləndirir ki, bu da mal dövriyyəsinin artmasına təkan verir.
Buna misal kimi Rusiyanı göstərmək olar. Enerji daşıyıcılarının bahalaşması Azərbaycanın kənd təsərrüfatı məhsullarının əsas idxalçısı olan Rusiya əhalisinin alıcılıq qabiliyyətini də gücləndirir. Buna görə də ruslar qiymət artımlarına baxmayaraq daha çox kənd təsərrüfatı məhsulu istehlak edir ki, bu da şimal qonşumuzda idxalı artırır.
Əgər neftin qiyməti mövcud səviyyədə qalarsa, Azərbaycanın kənd təsərrüfatı mallarının ixracında böyük artım qarşıdakı aylarda da davam edəcək.
Vasif
