FED faizləri aqressiv şəkildə artıracaq

 

Sfera.az "Bloomberg” saytına istinadən xəbər verir ki, artıq investorlar, şirkətlər, maliyyə qurumları FED-in faizləri artacağına tam əmindirlər.

Lakin indi əsas məsələ ABŞ üçün olduqca yüksək olan inflyasiya şəraitində FED-in hansı sürətlə faizləri artıracağıdır. Bəzi maliyyəçilər FED-in daha çox, amma kiçik artımlarla faizləri dəyişdirəcəyini güman edir. Amma yüksək inflyasiya şəraitində bunun səmərəli olmayacağını düşünənlər də var. Onların fikrincə, FED bir neçə qərarla böyük artımlar hesabına faizləri qaldırmalıdır.

Sent-Luisdəki FED-in icraçı direktoru Ceyms Bullard son 40 ilin ən yüksək inflyasiya səviyyəsinə cavab olaraq FED-in 1 iyul 2022-ci ilə qədər faiz dərəcələrini 100 baza bəndi artırmalı olduğunu açıqlayıb. O hesab edir ki, qeyd edilən tarixə qədər 3 toplantı keçirərək faizləri 1-1,25 səviyyəsinə qaldırmaq lazımdır. Bununla bərabər o, ikinci rübdən etibarən FED-in balansını kiçiltməyi və daha sonra cari məlumatlara əsaslanaraq ikinci yarıda faiz dərəcələrini təyin etməyi məqsədə uyğun hesab edir: 

"Son 40 ilin ən yüksək inflyasiyasına sahibik. Hesab edirəm ki, məlumatlara qarşı daha çevik və daha reaktiv olmalıyıq".

Dünyanın ən böyük banklarından olan "Goldman Sachs” proqnozlaşdırır ki, inflyasiyanın artması səbəbindən FED bu il 7 dəfə faizlərə baxacaq. Bankın iqtisadçıları güman edir ki, FED hər toplantısında faizləri 0,25 bənd artıraraq 2022-ci ilin sonunda 1,75-2 faiz səviyyəsinə çatdıracaq.

Almaniyanın ən böyük bankı olan "Deutsche Bank” da düşünür ki, bu il FED aqressiv faiz artımı həyata keçirəcək. Alman bankı faizlərin yalnız martda 50 bənd artırılacağını proqnozlaşdırır.