Neftin qiyməti növbəti həftə 95 dollara çatacaq
14:38 / 05.02.2022
1210
Enerji bazarında fevral ayı yüksək neft qiymətləri ilə başlayıb. "Brent” neftinin qiyməti bu həftənin son iş günündə 93,33 dollara yüksəldikdən sonra bir qədər azalaraq 92,78 dollarda qərarlaşıb. Cümə günü "Brent” nefti 1,83 faiz bahalaşıb.
Neftin dəyəri bu həftə ərzində 3,6 faiz, 2022-ci ilin əvvəlindən isə 16 faiz artıb.
Sfera.az xəbər verir ki, Azərbaycanın ixrac etdiyi neftin qiyməti daha çox yüksəlib. Ölkəmizin satdığı neftin dəyərində artım 21 faizə çatıb. İlin əvvəlində 82 dollara satılan neftin dəyəri cümə günü 99,3 dollara qədər qalxıb.
Neft qiymətlərindəki yüksəlişin nə qədər davam edəcəyi maraq doğurur. Neft bundan sonra nə qədər bahalaşa bilər?
Rusiyanın "Prime” Agentliyinə açıqlama verən "BCS World of Investments”in fond bazarı üzrə eksperti İqor Qalaktionov bildirib ki, bu həftədən aprel ayında çatdırılacaq neftin satışına başlanılıb. Onun müşahidələrinə əsasən, bazarda aktivlik və neftin bahalaşacağına dair gözləntilər hələ də qalır.
O qeyd edib ki, birjalarda neftə güclü tələb var və bu tələbə uyğun təklifi nə ABŞ, nə də OPEC+ istehsalı artırmaqla formalaşdıra bilir:
"OPEC+ çərçivəsində xammal istehsalçıları 2022-ci ilin mart ayı üçün kvotaları sutkada 400 min barel artıracaqlar. Amma bu artım kifayət etmir. Çünki tələblə təklif arasında böyük fərq yaranıb və bu fərqin qapadılması üçün hasilat daha çox artırılmalıdır. Amma bununla bağlı OPEC+ heç bir tədbir görmür və tədarük çatışmazlığı davam edir”.
Mütəxəssis proqnozlaşdırır ki, birjalarda mövcud olan vəziyyət davam edərsə, növbəti həftədə neft qiymətləri 90-94 dollar intervalında qalacaq. Qalaktionov qiymətlərin həftə ərzində 95 dollara çatmasının real olduğunu deyib.
Vasif
Sfera.az
