Bakıda tikinti materiallarının istehsalı kəskin artıb
İqtisadiyyat
13:22 / 03.02.2022
588
Azərbaycanda tikinti materiallarının çoxu Bakıda istehsal edilir.
Sfera.az xəbər verir ki, ötən il ərzində ölkəmizdə 872 milyon manat dəyərində tikinti materialı istehsal edilib. İstehsalın 615 milyon manatı, yəni 70,5 faizi Bakı şəhərində yerləşən müəssisələrin payına düşüb.
Paytaxtda tikinti materiallarının istehsalı 59,6 faiz artıb. Əvvəlki ilə nisbətən hörmə üçün hazır beton qarışığının istehsalı 42,7 faiz, tikinti gipsinin istehsalında isə 51,8 faiz artım baş verib.
Ölkəmizdə istehsal olunan sementin 82,4 faizi və ya 2,83 milyon tonu, hörmə üçün beton qarışığının 75,4 faizi, yaxud 2,09 milyon tonu, tikinti gipsinin 94 faizi və ya 33,6 min tonu Bakıda istehsal edilib.
Tikinti materialları istehsalının böyük hissəsinin Bakıda cəmləşməsinin əsas səbəblərindən biri tikinti-quraşdırma işlərinin daha çox hissəsinin paytaxtda həyata keçirilməsidir. Ölkəmizdə ötən il 11 milyard manatlıq tikinti-quraşdırma işi görülüb ki, bunun da yarısı Bakının payına düşür. Əvvəlki illərdə isə paytaxtın payı daha böyük olub.
Vasif
Sfera.az
