İllik inflyasiya bir qədər də yüksələcək
İqtisadiyyat
11:58 / 03.02.2022
647
Yanvarda Azərbaycanda illik qiymət artımlarının bir qədər də yüksəlmə ehtimalı güclüdür. İlk ayda bahalaşmanın bir qədər də güclənməsi bu ehtimalı irəli sürməyə əsas verir.
Sfera.az xatırladır ki, ötən ilin dekabrında illik qiymət artımı 12 faiz olub. Yanvarda çörəyin, meyvələrin, digər ərzaq məhsullarının, eyni zamanda qeyri-ərzaq və pullu xidmətlərin dəyərinin hissediləcək səviyyədə artması nəzərə alındığında aylıq inflyasiyanın 1,5 faizdən yüksək olması ehtimalı güclüdür. Bu şərt daxilində yanvarda illik qiymət səviyyəsinin ötən ilin ilk ayına nisbətən 12 faizdən çox olacağını proqnozlaşdırmaq mümkündür.
Hesablama göstərir ki, yanvarda aylıq inflyasiya 1,5 faiz olarsa illik bahalaşma 12,3 faiz, 1,7 faiz olarsa 12,6 faiz, 2 faiz olarsa 12,9 faiz təşkil edəcək.
Amma fevralda illik qiymət artımının zəifləmə ehtimalı var. Əgər bu ilin yanvarında aylıq bahalaşma 1,5 faiz olduqdan sonra, fevralda 1 faizə düşərsə, o halda ikinci ayda illik qiymət artımı sürəti zəifləyəcək.
Mart və digər aylarda isə aylıq bahalaşma 1 faiz səviyyəsində qalarsa, o zaman illik qiymət artımı sentyabra kimi 15 faizə qədər artacaq.
Lakin bu il dünyanın aparıcı Mərkəzi Bankları faiz dərəcələrini artırmağı planlaşdırır. Bu gözləntilər özünü doğruldarsa, aylıq qiymət artımları xeyli səngiyəcək və bu, illik qiymət artımlarını da zəiflədəcək.
Vasif
Sfera.az
